மேற்கு ரஷ்யாவில் உள்ள பெர்மில், 17 கிலோ எடையுள்ள ஒரு பூனை உடல் பருமனால் அவதிப்பட்டு வருகிறது. பொதுவாக ஒரு பூனை 4-5 கிலோ எடை கொண்டிருக்கும் நிலையில், இந்த பூனையின் எடை மிக அதிகமாக இருப்பது அனைவரையும் ஆச்சரியத்தில் ஆழ்த்தியுள்ளது.

இந்த பூனைக்கு ‘க்ரோஷிக்’ என்று பெயர். அதிகமாக சாப்பிடுவதால் சிறு வயதிலிருந்தே உடல் பருமனால் அவதிப்பட்டு வந்துள்ளது. தற்போது நடக்க கூட முடியாத நிலையில் இருப்பதால், ‘மேட்ரோஸ்கின்’ என்ற தங்குமிடத்தில் மறுவாழ்வு சிகிச்சை பெற்று வருகிறது.

மருத்துவர்கள் க்ரோஷிக்கிற்கு அல்ட்ராசவுண்ட் செய்ய முயற்சித்த போது, அதன் உடலில் கொழுப்பு அடுக்குகள் மிக அதிகமாக இருந்ததால் ஸ்கேன் செய்ய முடியவில்லை. இது மிகவும் அரிதான நிகழ்வு என மருத்துவர்கள் தெரிவித்துள்ளனர்.

தற்போது க்ரோஷிக் வாட்டர் டிரெட்மில்லில் நடந்து செல்லும் வீடியோ சமூக வலைத்தளங்களில் வைரலாகி வருகிறது. இந்த பூனை விரைவில் ஆரோக்கியமாகி எழுந்து நடக்கக் கற்றுக்கொள்ளும் என மருத்துவர்கள் நம்பிக்கை தெரிவித்துள்ளனர்.