தமிழகத்தில் 2026 சட்டமன்றத் தேர்தலுக்கான களம் இப்போதே தயாராகிவிட்டது. அதிமுக பொதுச்செயலாளர் எடப்பாடி பழனிசாமி, தங்கள் கட்சி ஆட்சிக்கு வந்தால் மகளிருக்கு மாதம் ₹2,000 உரிமைத் தொகை மற்றும் ஆண்களுக்கும் நகரப் பேருந்துகளில் இலவசப் பயணம் போன்ற அதிரடி வாக்குறுதிகளை அளித்துள்ளார். இது மக்களிடையே பெரும் வரவேற்பைப் பெற்றுள்ளது. இதற்குப் பதிலடி கொடுக்கும் வகையில், ஆளும் திமுக அரசும் புதிய திட்டங்களைத் தீட்டி வருகிறது.

தற்போது வழங்கப்படும் ₹1,000 மகளிர் உரிமைத் தொகையை மேலும் உயர்த்தவும், அதிமுக-வின் வாக்குறுதிகளை விடக் கவர்ச்சிகரமான அறிவிப்புகளை வெளியிடவும் திமுக தலைமை ஆலோசித்து வருவதாகக் கூறப்படுகிறது. இது பாஜக தலைமையிலான தேசிய ஜனநாயகக் கூட்டணி மற்றும் நடிகர் விஜய்யின் தமிழக வெற்றிக் கழகம் ஆகிய இரு தரப்புக்கும் பெரும் சவாலாக அமையும் என எதிர்பார்க்கப்படுகிறது. விரைவில் இதுகுறித்த அதிகாரப்பூர்வ அறிவிப்புகள் வெளியாகும் எனத் தெரிகிறது.