தெலங்கானா மாநில காவல் துறை தலைமை இயக்குநர் சி.வி. ஆனந்த், கிரிக்கெட் போட்டியில் தனது அதிரடி ஆட்டத்தால் கவனம் ஈர்த்துள்ளார். ஹைதராபாத் கிரிக்கெட் சங்கம் சார்பில் நடைபெற்ற சி-டிவிஷன் ஒருநாள் லீக் போட்டியில் செகந்தராபாத் கிளப் அணிக்காக அவர் விளையாடினார். தொடக்க ஆட்டக்காரராக களமிறங்கிய சி.வி. ஆனந்த், சிறப்பாக விளையாடி 82 பந்துகளில் ஆட்டமிழக்காமல் 126 ரன்கள் குவித்தார்.

இந்த ஆட்டத்தில் அவர் பவுண்டரிகளையும் சிக்ஸர்களையும் விளாசி அசத்தினார். அவரது அதிரடி ஆட்டத்தின் மூலம் செகந்தராபாத் கிளப் அணி பெரிய ஸ்கோரை எட்டியது. பேட்டிங்கில் மட்டுமின்றி பந்துவீச்சிலும் சி.வி. ஆனந்த் சிறப்பாக செயல்பட்டதாக தெரிவிக்கப்பட்டுள்ளது. அவரது ஆட்டம் அணியின் வெற்றிக்கு முக்கிய பங்களிப்பாக அமைந்தது.

சி.வி. ஆனந்துக்கு கிரிக்கெட் மீதான ஆர்வம் புதிதல்ல. ஐபிஎஸ் அதிகாரியாகும் முன்பே கிரிக்கெட் விளையாட்டில் ஆர்வத்துடன் ஈடுபட்டு வந்த அவர், இளையோர் அளவிலான போட்டிகளிலும் விளையாடியுள்ளார். செகந்தராபாத் கிளப் அணிக்காக ஏற்கெனவே பல சதங்களை பதிவு செய்துள்ள அவர், 2025-ஆம் ஆண்டிலும் தொடர்ந்து சிறப்பான ஆட்டத்தை வெளிப்படுத்தியதாக தெரிவிக்கப்பட்டுள்ளது. டிஜிபி பொறுப்பை ஏற்ற பிறகு இந்த லீக் போட்டியில் அவர் பதிவு செய்த முதல் சதம் இதுவாகும்.

பணிச்சுமைக்கு இடையிலும் உடல் ஆரோக்கியத்தையும் விளையாட்டு ஆர்வத்தையும் சி.வி. ஆனந்த் தொடர்ந்து பராமரித்து வருகிறார். கிரிக்கெட்டுடன் டென்னிஸ், கோல்ஃப் உள்ளிட்ட விளையாட்டுகளிலும் அவர் பங்கேற்பதாக கூறப்படுகிறது. கிரிக்கெட் போட்டியில் அவர் அதிரடியாக விளையாடிய புகைப்படங்கள் மற்றும் காணொலிகள் சமூக வலைதளங்களில் வேகமாகப் பரவி வருகின்றன. காவல் பணியில் உயர்ந்த பொறுப்பில் இருக்கும் அதிகாரி ஒருவர் கிரிக்கெட் களத்திலும் தனது திறமையை வெளிப்படுத்தியது பலரது கவனத்தையும் ஈர்த்துள்ளது.