நாடு சுதந்திரமடைந்து இத்தனை ஆண்டுகள் கடந்த பின்னேயும், கிராமப்புறங்களின் அடிப்படை வசதிகள் எந்த நிலையில் உள்ளன என்பதற்குப் பீகாரில் அரங்கேறிவரும் ஒரு சம்பவம் கண்ணீரை வரவழைப்பதாக உள்ளது. பீகார் மாநிலம் கிஷன்கஞ்ச் மாவட்டம் பகதூர்கஞ்ச் தொகுதியில், சாலை மற்றும் பாலம் இல்லாததால் இறந்தவர்களின் உடல்களைக் கூட நதியில் நீந்திக் கடந்து சென்று அடக்கம் செய்ய வேண்டிய அவல நிலை தொடர்கிறது.

பகதூர்கஞ்ச் வட்டாரத்தில் உள்ள பீர்பூர் கிராமத்தைச் சேர்ந்த 20 வயது இளம்பெண் சஹன்சவி பேகம், சமீபத்தில் நடந்த சாலை விபத்தில் பரிதாபமாக உயிரிழந்தார். அவரது உடலை இறுதிச் சடங்கிற்காக பைசா இடுகாட்டிற்குக் கொண்டு செல்ல வேண்டிய கட்டாயம் ஏற்பட்டபோதுதான், அப்பகுதி மக்கள் பல ஆண்டுகளாகச் சந்தித்து வரும் கொடூர யதார்த்தம் வெளிச்சத்திற்கு வந்தது.

நோதியா டோலி – பைசா காட் பகுதியில் ஆற்றின் மீது பாலம் இல்லாத காரணத்தினால், கிராம மக்கள் தங்களது உறவினரின் உடலைத் தோளில் சுமந்தபடி ஆபத்தான கக்வா நதியில் இறங்கி நீந்திச் செல்ல வேண்டிய பரிதாப நிலை ஏற்பட்டது. நதியின் நடுவே செல்லும் வேகமான நீரோட்டத்தையும், ஆழமான நீரையும் தாண்டிச் சென்றால் மட்டுமே இடுகாட்டை அடைய முடியும் என்ற கொடூரச் சூழல் அங்கு நிலவுகிறது.

சுமார் 50 ஏக்கர் பரப்பளவில் அமைந்துள்ள இந்த பைசா இடுகாடு, நோதியா டோலி, சக்சக்கி, ஜீங்காகாட்டா, தோகாச்சி உள்ளிட்ட பல்வேறு கிராமங்களைச் சேர்ந்த ஆயிரக்கணக்கான மக்களின் தலைமுறை தலைமுறையான இறுதித் தளமாகும். கோடைக்காலத்தில் எப்படியோ சமாளித்துவிடும் மக்கள், மழைக்காலத்தில் நதியில் நீர்மிரண்டு ஓடும்போது பெரும் அச்சுறுத்தலை எதிர்கொள்கின்றனர்.

மரியாதையுடன் கொடுக்கப்பட வேண்டிய இறுதி விடைபெறுதல் கூட, நீரோட்டத்துடன் போராடும் கொடூர நிகழ்வாக மாறுவது கிராம மக்களை மன உளைச்சலுக்கு ஆளாக்கியுள்ளது. இதுகுறித்து அப்பகுதி மக்கள் பலமுறை  அதிகாரிகளிடமும் முறையிட்டும், அமைச்சர்களைச் சந்தித்து மனு அளித்தும் வெறும் ‘வெற்று வாக்குறுதிகள்’ மட்டுமே மிஞ்சியுள்ளன.

இதுகுறித்து இடத்தின் நிலைமையை நேரில் ஆய்வு செய்த மாவட்ட கவுன்சில் பிரதிநிதி இம்ரான் ஆலம், பீகார் மாநில கிராமப்புறப் பணித்துறை அமைச்சர் சுனில் குமார் வரை இந்தப் பிரச்சினை கொண்டு செல்லப்பட்டதாகத் தெரிவித்தார். ஆனால், இதுவரை எந்தவொரு உறுதியான நடவடிக்கையும் எடுக்கப்படவில்லை.

“நாடு சுதந்திரம் அடைந்து 80 ஆண்டுகள் கடந்த பின்னரும், ஒரு இறுதி ஊர்வலத்திற்குக்கூட பாலம் இல்லாமல் மக்கள் நதியில் இறங்க வேண்டியிருப்பது எந்த வகையான வளர்ச்சி?” என்று அப்பகுதி மக்கள் ஆவேசமாகக் கேள்வி எழுப்புகின்றனர். கிஷன்கஞ்ச் மாவட்ட ஆட்சியரும், பீகார் அரசும் உடனடியாகத் தலையிட்டு நோதியா டோலி – பைசா காட் பகுதியில் கக்வா நதியின் மீது உடனடியாகப் பாலம் அமைத்துக் கொடுக்க வேண்டும் என்பதே இப்பகுதி மக்களின் கண்ணீருடன் கூடிய ஒரே கோரிக்கையாக உள்ளது.