தில்லியின் தென்கிழக்குப் பகுதியில் உள்ள ஜசோலா கிராமத்தில் காத்தாடியைத் துரத்திச் சென்ற 15 வயது சிறுவன் திறந்த சாக்கடையில் தவறி விழுந்த சம்பவம் சோகத்தை ஏற்படுத்தியுள்ளது. கடந்த சனிக்கிழமை காலை சுமார் 11 மணியளவில் இந்தச் சம்பவம் நடைபெற்றதாகத் தெரிவிக்கப்பட்டுள்ளது. எட்டாம் வகுப்பு படித்து வந்த மிதுன் என்ற சிறுவன் காத்தாடியைப் பிடிக்க முயன்றபோது எதிர்பாராதவிதமாக திறந்த நிலையில் இருந்த சாக்கடைக்குள் விழுந்ததாக முதற்கட்ட விசாரணையில் தெரியவந்துள்ளது. சிறுவன் வீடு திரும்பாததால் அதிர்ச்சியடைந்த குடும்பத்தினர் உடனடியாக தேடத் தொடங்கினர். பின்னர் அதிகாரிகளுக்கும் தகவல் தெரிவிக்கப்பட்டது. இதையடுத்து சிறுவனை மீட்கும் பணிகள் தீவிரமாக மேற்கொள்ளப்பட்டன.

சிறுவனைத் தேடும் பணியில் தில்லி தீயணைப்புப் படை, தேசிய பேரிடர் மீட்புப் படை மற்றும் பல்வேறு மீட்புக் குழுவினர் ஈடுபட்டனர். சாக்கடையில் தண்ணீரின் வேகம் அதிகமாக இருந்ததால் சிறுவனை கண்டுபிடிப்பதில் சிரமம் ஏற்பட்டதாக அதிகாரிகள் தெரிவித்தனர். மீட்புப் பணியாளர்கள் பல்வேறு உபகரணங்களுடன் தேடியும் உடனடியாக சிறுவனை கண்டுபிடிக்க முடியவில்லை. இதற்கிடையில், தனது மகனைக் காணாமல் தவித்த தந்தை தானாகவே சாக்கடைக்குள் இறங்கி தேடிய காணொளி சமூக வலைதளங்களில் பரவியது. கையில் குச்சியை வைத்துக்கொண்டு குப்பைகளுக்கு இடையே மகனைத் தேடும் தந்தையின் காட்சி பலரையும் வேதனையில் ஆழ்த்தியது.

சிறுவனைத் தேடும் பணி தொடர்ந்து நான்கு நாட்களாக நடைபெற்ற நிலையில், செவ்வாய்க்கிழமை அவரது உடல் சாக்கடையில் இருந்து மீட்கப்பட்டது. பிற்பகல் 1.15 மணியளவில் மீட்புக் குழுவினர் சிறுவனின் உடலை கண்டெடுத்ததாகத் தகவல் வெளியாகியுள்ளது. இதையடுத்து, அவரது உடல் பிரேதப் பரிசோதனைக்காக அனுப்பி வைக்கப்பட்டது. இந்தச் சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ளது. குடியிருப்புப் பகுதி வழியாகச் செல்லும் சாக்கடை திறந்த நிலையில் இருப்பது தொடர்பாகவும் தற்போது கேள்விகள் எழுந்துள்ளன. பொதுமக்களின் பாதுகாப்பை கருத்தில் கொண்டு திறந்த சாக்கடைகளை உரிய முறையில் மூட வேண்டும் என்ற கோரிக்கையும் எழுந்துள்ளது.

இந்தச் சம்பவத்தைத் தொடர்ந்து தில்லி மாநகராட்சியின் தென்கிழக்கு மத்திய மண்டலத்தைச் சேர்ந்த இளநிலைப் பொறியாளர் ஒருவர் பணியிடைநீக்கம் செய்யப்பட்டுள்ளார். பணியில் அலட்சியம் காட்டியதாகக் கூறி அவருக்கு எதிராக ஒழுங்கு நடவடிக்கை தொடங்கப்பட்டுள்ளதாக மாநகராட்சி தெரிவித்துள்ளது. சாக்கடையை பராமரிக்கும் பொறுப்பு எந்தத் துறைக்கு உள்ளது என்பது தொடர்பாகவும் அதிகாரிகளிடம் விசாரணை மேற்கொள்ளப்பட்டுள்ளது. சிறுவனின் குடும்பம் உத்தரப் பிரதேசத்தைச் சேர்ந்தது என்றும், தில்லியில் கூலி வேலை செய்து வருவதாகவும் தகவல்கள் தெரிவிக்கின்றன. காத்தாடியைத் துரத்திச் சென்ற சிறுவனுக்கு நேர்ந்த இந்த துயர சம்பவம், திறந்த நிலையில் உள்ள சாக்கடைகளால் ஏற்படும் ஆபத்து குறித்து மீண்டும் கவனத்தை ஈர்த்துள்ளது.