சில நேரங்களில் அன்பை வெளிப்படுத்த பெரிய பரிசுகளோ, வார்த்தைகளோ தேவையில்லை; தேவையான நேரத்தில் ஒருவர் மற்றொருவருக்கு செய்யும் சிறிய உதவியே போதுமானதாக இருக்கும். அந்த வகையில், உடல்நிலை சரியில்லாத தனது மனைவிக்கு உதவுவதற்காக அவரது கணவர் வேலை செய்யும் வீட்டுக்கே வந்து சமையலறையில் இணைந்து பணியாற்றிய காணொளி இணையத்தில் கவனம் பெற்றுள்ளது. வீட்டில் பணியாற்றும் பெண்ணுக்கு உடல்நிலை சரியில்லாததை அறிந்த அவரது கணவர், அவர் மட்டும் சிரமப்பட வேண்டாம் என்பதற்காக உடனடியாக உதவ முன்வந்துள்ளார். இருவரும் இணைந்து சமையலறையில் வேலை செய்யும் காட்சி பலரையும் நெகிழச் செய்துள்ளது. மனைவியின் சிரமத்தைப் புரிந்துகொண்டு அவருக்கு துணையாக கணவர் நின்ற விதம் இணையவாசிகளின் கவனத்தை ஈர்த்துள்ளது.
இந்தக் காணொளியை பூர்ணா ஸ்ரீவத்சா என்பவர் இன்ஸ்டாகிராமில் பகிர்ந்துள்ளார். அதில், உடல்நிலை சரியில்லாததால் வீட்டில் பணியாற்றும் பெண்ணுக்கு அவரது கணவர் உதவுவதற்காக உடன் வந்ததாக குறிப்பிடப்பட்டுள்ளது. மனைவியின் வேலை விரைவாக முடிவதற்கு உதவும் வகையில், கணவரும் சமையலறையில் அவருடன் சேர்ந்து பணியாற்றுகிறார். இதனைப் பார்த்த பலர், “அன்பு என்பது பேசுவதில் மட்டுமல்ல; தேவைப்படும் நேரத்தில் செய்து காட்டுவதிலும் இருக்கிறது” என்று பாராட்டினர். இந்தக் காட்சி ஒரு நல்ல வாழ்க்கைத் துணைக்கு எடுத்துக்காட்டாக இருப்பதாகவும் பலர் கருத்து தெரிவித்தனர். சிறிய செயலில் வெளிப்பட்ட இந்த அக்கறைதான் காணொளியைப் பார்ப்பவர்களின் மனதை அதிகம் கவர்ந்துள்ளது.
View this post on Instagram
இதுகுறித்து காணொளியைப் பகிர்ந்தவர் பின்னர் விளக்கமும் அளித்துள்ளார். உடல்நிலை சரியில்லாத அந்தப் பெண் வேலைக்கு வருவதற்கு முன்பு தனது உடல்நிலை குறித்து தெரிவிக்கவில்லை என்றும், வேலைக்கு வந்த பின்னர்தான் அவருக்கு உடல்நிலை சரியில்லை என்பது தெரியவந்ததாகவும் கூறப்பட்டுள்ளது. இதையடுத்து, உடல்நிலை சரியில்லை என்றால் ஓய்வெடுக்கலாம் என அவரிடம் தெரிவிக்கப்பட்டதாகவும் கூறப்படுகிறது. மனைவிக்கு ஆதரவாக இருக்கும் கணவர், வார்த்தைகளால் மட்டும் அன்பை வெளிப்படுத்தாமல் செயலில் காட்டுகிறார் என்பதையே இந்தக் காணொளி உணர்த்துவதாக பதிவிட்டவர் குறிப்பிட்டுள்ளார். வாழ்க்கையில் பெரிய விஷயங்களைவிட, இவ்வாறான சிறிய அக்கறைகள்தான் சில நேரங்களில் அதிகமான அர்த்தத்தை ஏற்படுத்துகின்றன என்றும் அவர் தெரிவித்துள்ளார்.
இந்தக் காணொளிக்கு இணையவாசிகளிடம் கலவையான கருத்துகள் பதிவாகியுள்ளன. பலர் கணவரின் செயலைப் பாராட்டி, “இப்படிப்பட்ட துணை கிடைத்தது அதிர்ஷ்டம்” என்று கருத்து தெரிவித்துள்ளனர். சிலர் தங்களது வாழ்க்கையிலும் இதுபோன்ற அனுபவங்கள் இருப்பதாக பகிர்ந்துள்ளனர். குறிப்பாக, உடல்நிலை சரியில்லாத நேரங்களில் தங்களது கணவர் வீட்டுப் பணிகளை கவனித்துக்கொள்வதாக சிலர் தெரிவித்துள்ளனர். அதேவேளையில், மற்றொருவரின் வீட்டில் வேலை செய்யும்போது கணவரை உடன் அழைத்து வருவது சரியா என்றும் சிலர் கேள்வி எழுப்பியுள்ளனர். இருப்பினும், தேவையான நேரத்தில் மனைவிக்கு துணையாக நின்ற கணவரின் செயல் பலரது கவனத்தையும் பெற்றுள்ளதுடன், இந்தக் காணொளி தற்போது சமூக வலைதளங்களில் பரவி வருகிறது.
