மத்தியப் பிரதேச மாநிலம் பிந்த் மாவட்டத்தில், எவ்வித உரிமமும் இன்றி மிக மோசமான சுகாதாரமற்ற சூழலில் இயங்கி வந்த நூடுல்ஸ் மற்றும் சேமியா தயாரிப்பு ஆலைக்கு உணவுப் பாதுகாப்புத் துறை அதிகாரிகள் அதிரடியாகச் சென்று சோதனையிட்டு சீல் வைத்தனர். எதிர்வரும் ரக்ஷா பந்தன் பண்டிகையை முன்னிட்டு, பண்டிகைக்கால தேவையைப் பயன்படுத்தி தரமற்ற உணவுப் பொருட்களை அண்டை மாவட்டங்களுக்கு விநியோகம் செய்யத் திட்டமிட்டிருந்தது விசாரணையில் அம்பலமாகியுள்ளது.

ஆய்வின் போது, மிகவும் அசுத்தமான சூழலில் உணவுப் பொருட்கள் தயாரிக்கப்பட்டு வந்தது கண்டுபிடிக்கப்பட்டது. ஆலையிலிருந்து சுமார் 200 மூட்டை மைதா மாவு, 50 கார்ட்டன் பெட்டிகளில் அடைக்கப்பட்ட நூடுல்ஸ் மற்றும் பெருமளவிலான மூலப்பொருட்கள் பறிமுதல் செய்யப்பட்டன. மேலும், ‘ரியல் கோல்ட் மோடி சேமியா’ என்ற பெயரிடப்பட்ட உறைகளுக்குள், சட்டவிரோதமாக நூடுல்ஸ்களை அடைத்து விற்பனைக்கு தயார் நிலையில் வைத்திருந்த அதிர்ச்சித் தகவலும் வெளிச்சத்திற்கு வந்துள்ளது.

இதுமட்டுமன்றி, தயாரிப்புப் பணிகள் பிந்த் பகுதியில் நடைபெற்று வந்த நிலையில், விற்பனைப் பொட்டலங்களின் முகவரியில் குவாலியர் மற்றும் ஜான்சி நகரங்களின் பெயர்கள் அச்சிடப்பட்டிருந்தது கண்டறியப்பட்டது. இதையடுத்து, சுமார் ரூ.4 லட்சத்திற்கும் அதிகமான மதிப்புள்ள உணவுப் பொருட்களைப் பறிமுதல் செய்த அதிகாரிகள், ஆலையின் உற்பத்தியை உடனடியாக நிறுத்தி முத்திரையிட்டனர். கைப்பற்றப்பட்ட மாதிரிகள் ஆய்வகப் பரிசோதனைக்கு அனுப்பி வைக்கப்பட்டுள்ளன.

ஆய்வக அறிக்கை வரப்பெற்றதும், சம்பந்தப்பட்ட ஆலை உரிமையாளர்கள் மீது உணவுப் பாதுகாப்பு மற்றும் தரநிலைகள் சட்டத்தின் கீழ் கடுமையான சட்டப்பூர்வ நடவடிக்கைகள் மேற்கொள்ளப்படும் என அதிகாரிகள் தெரிவித்தனர். இதனிடையே, குஜராத் மாநிலம் சூரத் மற்றும் பனாஸ்காந்தா பகுதிகளில் அண்மையில் மேற்கொள்ளப்பட்ட சோதனையில் ரூ.35 லட்சம் மதிப்பிலான 6,000 லிட்டர் போலி நெய் பறிமுதல் செய்யப்பட்டு, மாபெரும் கலப்பட கும்பல் பிடிபட்டது குறிப்பிடத்தக்கது.