பெங்களூரு அருகே உள்ள குட்டேபசவேசுவரா லே-அவுட் பகுதியில் அரங்கேறியுள்ள ஒரு கொடூரச் சம்பவம் அப்பகுதியில் பெரும் அதிர்ச்சியையும் பீதியையும் ஏற்படுத்தியுள்ளது. கள்ளக்காதலுக்குத் தடையாக இருந்த கணவரையும்,  4 வயது பச்சிளம் மகனையும் மனைவியே தனது காதலனுடன் சேர்ந்து தீர்த்துக்கட்டிய திடுக்கிடும் உண்மைகள் காவல்துறையினர் விசாரணையில் வெளிச்சத்திற்கு வந்துள்ளன.

பெங்களூருவில் வசித்து வந்தவர் அபிநந்தன் (வயது 38).  ஒரு தனியார் நிறுவனத்தில் ஊழியராகப் பணியாற்றி வந்தார். இவருக்கும் ஹரினி என்ற பெண்ணுக்கும் கடந்த 6 ஆண்டுகளுக்கு முன்பு திருமணம் நடைபெற்றது. இவர்களுக்கு யதுவீர் (4) என்ற அழகான ஆண் குழந்தை இருந்தது. இவர்களின் குடும்ப வாழ்க்கையில் கள்ளக்காதல் விவகாரம் பேரிடியாக வந்து விழுந்துள்ளது. ஹரினிக்கு வினய்  என்பவருடன் பழக்கம் ஏற்பட்டு, அது நாளடைவில் கள்ளக்காதலாக மாறியுள்ளது. இதைக் கண்டறிந்த அபிநந்தன், மனைவியைக் கடுமையாகக் கண்டித்து வந்துள்ளார். இதனால் கணவன்-மனைவி இடையே அடிக்கடி தகராறுகளும் வெடித்துள்ளது.

கடந்த 16-ஆம் தேதியன்றும் வழக்கம் போல் கணவன்-மனைவி இடையே தகராறு ஏற்பட்டுள்ளது. கோபமடைந்த அபிநந்தன், தனது 4 வயது மகன் யதுவீருடன் மட்டும் தனி அறையில் சென்று படுத்துள்ளார். இந்தத் தருணத்தைப் பயன்படுத்திக் கொண்ட ஹரினி, தனது கள்ளக்காதலன் வினய்யைத் தொலைபேசி மூலம் தொடர்பு கொண்டு நள்ளிரவில் ரகசியமாக வீட்டிற்கு வரவழைத்துள்ளார். இருவரும் சேர்ந்து கொண்டு, தூங்கிக் கொண்டிருந்த அபிநந்தனை இரும்பு கம்பியால் கொடூரமாகத் தாக்கியுள்ளனர். கணவனின் அலறல் சத்தம் வெளியே கேட்காதவாறு சதி செய்தவர்கள், பச்சிளம் குழந்தை என்றும் பாராமல் 4 வயது சிறுவன் யதுவீரின் கழுத்தை நெரித்துக் கொடூரமாகக் கொலை செய்துள்ளனர்.

மறுநாள் காலையில் அபிநந்தனும் அவரது மகனும் மர்மமான முறையில் இறந்து கிடப்பதாக போலீசார் ஆரம்பத்தில் வழக்கப்பதிவு செய்து விசாரித்தனர். ஆனால், அபிநந்தனின் மனைவி ஹரினியிடம் நடத்தப்பட்ட தீவிர மற்றும் அதிரடி விசாரணையில் மொத்த உண்மைகளும் அம்பலமானது. கள்ளக்காதலுக்கு இடையூறாக இருந்த காரணத்தினால் கணவனையும், தன் வயிற்றில் பிறந்த 4 வயது மகனையும் சொந்தத் தாயே காதலனுடன் சேர்ந்து படுகொலை செய்த இந்தச் சம்பவம் பெங்களூரு நகரில் பெரும் அதிர்வலைகளை ஏற்படுத்தியுள்ளது. இதனைத் தொடர்ந்து ஹரினியைப் போலீசார் கைது செய்தனர். மேலும், தலைமறைவாக இருந்த கள்ளக்காதலன் வினய்யையும் நேற்று இரவு போலீசார் சுற்றிவளைத்துக் கைது செய்து சிறையில் அடைத்தனர்.