ஆன்லைன் ஆப் மூலமாகப் பைக் மற்றும் கார் டேக்சி முன்பதிவு செய்து பயணிப்பது இன்றைய அவசர யுகத்தில் மக்களிடையே மிகச் சாதாரணமான ஒன்றாக மாறிவிட்டது.

ஆனால், அதிலும் சேவை வழங்கும் ஓட்டுநர்களின் சில அநியாயப் போக்காலும், கூடுதல் கட்டண வசூலாலும் பயணிகள் நாளும் சந்திக்கும் இன்னல்கள் கொஞ்ச நஞ்சமல்ல. அந்த வகையில், பைக் டேக்சி சேவையான ராபிடோ நிறுவனத்தின் ஓட்டுநர் ஒருவர், சுமார் 30 நிமிடங்கள் தாமதமாக வந்ததோடு மட்டுமில்லாமல், பெண்ணிடம் கூடுதலாக 50 ரூபாய் காத்திருப்பு கட்டணம்  கேட்ட விவகாரத்தில், அப்பெண் தர மறுத்ததால் சவாரியையே ரத்து செய்த சம்பவம் சமூக வலைதளங்களில் பெரும் புயலைக் கிளப்பியுள்ளது.

பாதிக்கப்பட்ட பெண் தனது அவசரப் பயணத்திற்காக ஆப் மூலம் பைக் டேக்சியை முன்பதிவு செய்துள்ளார். ஆனால், அந்த ஓட்டுநர் குறித்த நேரத்திற்கு வராமல் அரை மணி நேரம் தாமதித்து வந்துள்ளார். இத்தனை தாமதத்திற்குப் பிறகும், தான் வந்தடைந்த இடத்திற்குப் பெண் வர தாமதமானதாகக் கூறி, 50 ரூபாய் கூடுதல் கட்டணம் கொடுத்தால் மட்டுமே சவாரியைத் தொடர முடியும் என அந்த ஓட்டுநர் அடம்பிடித்துள்ளார்.

தான் பல முறை தொடர்பு கொண்டும் சரியான நேரத்தில் வராத ஓட்டுநரின் இந்தக் கூடுதல் கட்டணக் கோரிக்கையை ஏற்க மறுத்த அந்தப் பெண் நியாயம் கேட்கவே, ஆத்திரமடைந்த ஓட்டுநர் சவாரியை அப்படியே ரத்து செய்துவிட்டு அந்தப் பெண்ணை நடுவழியில் தவிக்க விட்டுச் சென்றுள்ளார்.

தான் சந்தித்த இந்த அநியாயமான அனுபவத்தை அப்பெண் சமூக வலைதளத்தில் ஆதாரங்களுடன் பதிவிட்டதைத் தொடர்ந்து, அந்தப் பதிவு இணையவாசிகளிடையே காட்டுத் தீயாகப் பரவி வருகிறது. “அரை மணி நேரம் தாமதமா வந்த ஓட்டுநருக்குத் தான் பயணி நஷ்டஈடு கேட்க வேண்டும், இதில் ஓட்டுநர் கூடுதல் பணம் கேட்பது எந்த விதத்தில் நியாயம்?” என்று நெட்டிசன்கள் பலரும் அந்த ஓட்டுநரைக் கடுமையாக விமர்சித்து வருகின்றனர்.

இத்தகைய முறைகேடான செயல்களில் ஈடுபடும் ஓட்டுநர்கள் மீது ராபிடோ நிறுவனம் கடுமையான நடவடிக்கை எடுக்க வேண்டும் என்றும், பயணிகளின் பாதுகாப்பையும் நேரத்தையும் உறுதி செய்ய வேண்டும் என்றும் பொதுமக்கள் சார்பில் கோரிக்கைகள் எழுந்து வருகின்றன.