சுதந்திர தின நன்னாளில் தமிழக விவசாயிகளுக்கு மகிழ்ச்சியளிக்கும் விதமாக, கர்நாடக அரசு கபினி மற்றும் கே.ஆர்.எஸ் (கிருஷ்ணராஜ சாகர்) ஆகிய இரு முக்கிய அணைகளில் இருந்தும் காவிரி நீரைத் திறந்துவிட்டுள்ளது.
தமிழகத்திற்குக் குறிப்பிட்ட அளவிலான காவிரி நீரை உரிய காலத்தில் திறந்துவிடக் கோரி, தமிழ்நாடு அரசு சார்பில் உச்சநீதிமன்றத்தில் தொடர்ந்து வழக்குகள் நடத்தப்பட்டு வருகின்றன. இந்த நிலையில், நீர் திறப்பு தொடர்பான வழக்கு நாளை மறுநாள் உச்சநீதிமன்றத்தில் மீண்டும் விசாரணைக்கு வர உள்ளது.
நீதிமன்றத்தில் வழக்கு விசாரணைக்கு வந்து கடுமையான உத்தரவுகள் பிறப்பிக்கப்படலாம் என்பதை உணர்ந்த கர்நாடக அரசு, அதற்கு முன்பாகவே அவசர அவசரமாகக் கபினி மற்றும் கே.ஆர்.எஸ் அணைகளிலிருந்து தமிழகத்திற்குத் தண்ணீரைத் திறந்துவிட்டுள்ளது.
சுதந்திர தின நாளில் வெளியாகியுள்ள இந்தத் தகவல், காவிரி பாசனப் பகுதி விவசாயிகள் மற்றும் பொதுமக்களிடையே பெரும் மகிழ்ச்சியையும் நிம்மதியையும் ஏற்படுத்தியுள்ளது. உச்சநீதிமன்ற வழக்கின் காரணமாகவே கர்நாடக அரசு இந்த முடிவை எடுத்துள்ளதாக அரசியல் வட்டாரங்கள் தெரிவிக்கின்றன.
