ஒடிசா மாநிலம் புவனேஸ்வர் விமான நிலையத்தில் இண்டிகோ விமான சேவை திடீரென ரத்து செய்யப்பட்டதால், பயணிகள் பல மணி நேரம் காத்திருக்க வைத்து அவதிக்குள்ளான சம்பவம் பெரும் பரபரப்பை ஏற்படுத்தியுள்ளது. மதியம் 2:35 மணிக்குத் புறப்பட வேண்டிய இண்டிகோ விமானம், எந்தவித முன்னறிவிப்பும் இல்லாமல் மாலை 5:30 மணியளவில் திடீரென ரத்து செய்யப்படுவதாக அறிவிக்கப்பட்டது. இதனால் விமான நிலையத்திற்கு வந்திருந்த பயணிகள் அனைவரும் என்ன செய்வது என்று தெரியாமல் நடுவழியில் தவித்தனர்.
விமானம் ரத்து செய்யப்பட்டது குறித்துத் தங்களுக்கு உரிய நேரத்தில் தகவல் தெரிவிக்கப்படவில்லை என்றும், விமான நிலையப் பணியாளர்கள் தகுந்த ஒத்துழைப்பு வழங்கவில்லை என்றும் பயணிகள் குற்றம் சாட்டினர். மாலை 6 மணி ஆகியும் மாற்று ஏற்பாடுகள் குறித்த எந்தத் தெளிவான பதிலும் அளிக்கப்படாமல் தங்களை அலட்சியப்படுத்தியதாகப் பயணிகள் தங்களது ஆவேசத்தை வெளிப்படுத்தினர்.
இதற்கிடையில், அங்கு எடுக்கப்பட்ட வைரல் வீடியோ ஒன்று சமூக வலைதளங்களில் பரவி வருகிறது. அந்த வீடியோவில், ஆத்திரமடைந்த பெண் பயணி ஒருவர் இண்டிகோ கவுண்டரை நோக்கி ஆவேசமாக ஓடிச்சென்று ஊழியர்களிடம் வாக்குவாதத்தில் ஈடுபடுவதைக் காண முடிகிறது. “என் குழந்தை நோயால் பாதிக்கப்பட்டுள்ளது, உங்களுக்கு நேரத்தின் மதிப்பைப் பற்றித் தெரியவில்லையா?” என்று அவர் கோபமாகக் கத்துகிறார். அதுமட்டுமின்றி, ஆத்திரம் தாங்காமல் மேசையில் இருந்த டெலிபோனைத் தூக்கி கீழே அடித்துடைத்துவிட்டுத் தொடர்ந்து ஊழியர்களை நோக்கிச் சண்டையிடும் காட்சிகளும் அதில் பதிவாகியுள்ளன.
View this post on Instagram
பாதிக்கப்பட்ட பயணி ஒருவர் கூறுகையில், “எங்கள் விமானம் மதியம் 2:35 மணிக்குச் செல்ல வேண்டியது. ஆனால், எந்தவித முறையான முன்னறிவிப்பும் இல்லாமல் மாலை 5:30 மணிக்கு ரத்து செய்யப்பட்டதாகக் கூறினார்கள். நாங்கள் புவனேஸ்வர் விமான நிலையத்தில் பரிதவித்து நிற்கிறோம், இதுவரை எங்களுக்கு எந்தவொரு திருப்திகரமான பதிலும் கிடைக்கவில்லை” என்றார்.
விமானம் ரத்து செய்யப்பட்டதற்கான உண்மையான காரணம் என்ன என்பது உடனடியாகத் தெரியவரவில்லை. மாற்றுப் பயண ஏற்பாடுகள் மற்றும் முறையான உதவிகள் கிடைக்காமல் அவதிப்பட்ட பயணிகள், விமான நிலைய அதிகாரிகளிடம் விளக்கம் கேட்டுத் தொடர்ந்து போராட்டத்தில் ஈடுபட்டனர்.
