பள்ளிக்கூடத்தில் பாடம் நடத்திக் கொண்டிருந்தபோதே வகுப்பறையின் மேற்கூரை பிளாஸ்டர் திடீரென இடிந்து விழுந்து ஆசிரியர் தலையில் பலத்த காயமடைந்த சம்பவம் பெரும் பரபரப்பை ஏற்படுத்தியுள்ளது. அதிர்ஷ்டவசமாக வகுப்பறையில் இருந்த மாணவர்கள் எந்தவித காயமுமின்றி மயிரிழையில் உயிர் தப்பியுள்ள நிலையில், இந்தச் சம்பவம் ஆசிரியர்கள் மற்றும் மாணவர்களிடையே பெரும் பீதியை ஏற்படுத்தியுள்ளது.
பள்ளியின் ஏழாம் வகுப்பு மாணவர்களுக்கு உதவி ஆசிரியர் ஜாஹிதுல் இஸ்லாம் பாடம் எடுத்துக் கொண்டிருந்தபோது, திடீரென பலத்த சத்தத்துடன் மேற்கூரையின் பிளாஸ்டர் பெயர்ந்து அவரது தலையில் நேரடியாக விழுந்துள்ளது. கண்முன்னே ஆசிரியர் தலையில் கான்கிரீட் விழுந்து காயமடைந்ததைக் கண்ட மாணவர்கள் கூச்சலிட்டு அலறி அடித்து ஓடியுள்ளனர். காயமடைந்த ஆசிரியருக்கு உடனடியாக முதலுதவி சிகிச்சை அளிக்கப்பட்டது.
இந்த சம்பவம் குறித்து கருத்து தெரிவித்த பள்ளி தலைமை ஆசிரியர், இந்த பள்ளி கட்டிடம் கடந்த 1960-ஆம் ஆண்டு கட்டப்பட்ட பழமையான கட்டிடம் என்றும், இதன் காரணமாகவே கூரை பலவீனமடைந்து இடிந்து விழுந்துள்ளதாகவும் தெரிவித்துள்ளார். மேலும், இதுகுறித்து உயர் அதிகாரிகளுக்கு உடனடியாக தகவல் தெரிவிக்கப்பட்டு அடுத்தகட்ட நடவடிக்கைகள் எடுக்கப்படும் என்றும் அவர் உறுதியளித்துள்ளார்.
ஆபத்தான மற்றும் பழமையான கட்டிடங்களில் வகுப்புகளை நடத்துவது மாணவர்கள் மற்றும் ஆசிரியர்களின் உயிருக்கே அச்சுறுத்தலாக இருப்பதாக பெற்றோர்கள் குற்றம்சாட்டியுள்ளனர். உடனடியாக கட்டிடத்தை ஆய்வு செய்து சீரமைக்க வேண்டும் அல்லது புதிய கட்டிடம் கட்ட வேண்டும் என அவர்கள் கோரிக்கை விடுத்துள்ள நிலையில், இதுகுறித்து உரிய விசாரணை நடத்தப்படும் என அதிகாரிகள் தெரிவித்துள்ளனர்.
