தமிழ் சினிமாவில் ‘வண்ண வண்ண பூக்கள்’, ‘ஆத்தா உன் கோயிலிலே’ போன்ற புகழ்பெற்ற திரைப்படங்களில் கதாநாயகியாக நடித்து ரசிகர்களின் மனங்களைக் கவர்ந்த பிரபல நடிகை வினோதினி, சென்னை தி.நகரில் உள்ள பிரபல ஸ்பா ஒன்றில் தனது தங்கத் தாலிச் சங்கிலியைப் பறிகொடுத்துள்ள சம்பவம் பெரும் அதிர்ச்சியையும் பரபரப்பையும் ஏற்படுத்தியுள்ளது.

தீவிர மன அழுத்தத்தில் இருந்ததால் மன அமைதிக்காக ஸ்பாவிற்குச் சென்றதாகக் கூறியுள்ள அவர், அங்கு மசாஜ் செய்வதற்காகத் தனது கழுத்தில் இருந்த தாலிச் சங்கிலியைக் கழற்றி, ஸ்பா ஊழியர்கள் கொடுத்த டப்பாவில் பத்திரமாக வைத்ததாகத் தெரிவித்துள்ளார். ஆனால், மசாஜ் முடிந்த பிறகு ஏற்பட்ட ரிலாக்ஸ் மூட் மற்றும் அவசரமான சூழ்நிலை காரணமாக அந்த நகையை மீண்டும் எடுக்க மறந்ததால், அது அங்கேயே மாயமாகியுள்ளது.

வீட்டிற்கு வந்து உடனடியாகத் தூங்கிவிட்ட நிலையிலும், பின்னர் தனது கணவரின் குடும்பத்தில் எதிர்பாராதவிதமாக ஒரு இறப்பு செய்தி வந்ததால் அவசரமாக அங்கு சென்றுவிட்டதாலும், இரண்டு நாட்கள் கழித்தே தனது தாலிச் சங்கிலி மாயமானதை வினோதினி உணர்ந்துள்ளார்.

உடனடியாகச் சம்பந்தப்பட்ட ஸ்பாவிற்கு நேரில் சென்று விசாரித்தபோது, அங்கிருந்த ஊழியர்களும் உரிமையாளரும் மிகவும் அலட்சியமாகப் பதிலளித்து, தங்களுக்கு எதுவும் தெரியாது என்றும், இத்தனை நாட்கள் கழித்துக் கேட்பதால் தங்களால் பொறுப்பேற்க முடியாது என்றும் கையை விரித்துவிட்டதாக அவர் வேதனையுடன் தெரிவித்துள்ளார்.

மேலும், தான் கிளம்பும்போது மரியாதையாகச் செருப்பைத் தட்டில் வைத்துக்கொடுத்த ஊழியர்கள், டப்பாவில் வைத்த தாலிச் சங்கிலியைக் கொடுக்காமல் ஏமாற்றிவிட்டதாகக் குற்றம் சாட்டியுள்ள அவர், இதுகுறித்து காவல் நிலையத்திலும் அதிகாரப்பூர்வமாகப் புகார் அளித்துள்ளார்.

இது தொடர்பாகத் தனது சமூக வலைதளப் பக்கத்தில் வீடியோ பதிவு ஒன்றை வெளியிட்டுள்ள நடிகை வினோதினி, ஸ்பாக்களுக்குச் செல்லும் பெண்கள் தங்களது விலைமதிப்பற்ற தங்க நகைகள் மற்றும் பொருட்களை மிகவும் எச்சரிக்கையுடனும் கவனத்துடனும் பாதுகாத்துக் கொள்ள வேண்டும் என்றும், முடிந்தவரை இதுபோன்ற இடங்களுக்குச் செல்லும்போது நகைகளை அணிந்து செல்வதைத் தவிர்க்க வேண்டும் என்றும் கண்ணீர்மல்க வேண்டுகோள் விடுத்துள்ளார்.

மன நிம்மதி தேடிச் சென்ற இடத்தில் தனது தாலிச் சங்கிலியையே பறிகொடுத்து நிற்கும் ஒரு மூத்த நடிகையின் இந்த ஆதங்கமான வீடியோ தற்போது இணையத்தில் பரவி வருகிறது. காவல் துறையின் தீவிர விசாரணையில் தனது தாலிச் சங்கிலி நிச்சயம் மீண்டும் கிடைக்கும் என்ற நம்பிக்கையுடன் அவர் காத்திருக்கும் நிலையில், இந்தச் சம்பவம் பொதுமக்கள் மற்றும் திரைத்துறையினர் இடையே பெரும் விவாதப் பொருளாக மாறியுள்ளது.

“>