பிரபல லாவா செல்போன் நிறுவனத்தின் சிறப்பான விற்பனை இலக்கை எட்டியதற்காக, அந்நிறுவனம் மூலம் வியட்நாம் நாட்டிற்குச் சுற்றுலாச் சென்ற தென்னிந்திய விநியோகஸ்தர்களின் ஸ்பீட் படகு நடுக்கடலில் கவிழ்ந்து விபத்துக்குள்ளான கோரச் சம்பவத்தில், திருச்சியைச் சேர்ந்த அழகு ராஜன் என்ற விநியோகஸ்தரும் பரிதாபமாக உயிரிழந்துள்ளார்.

லாவா மொபைல் நிறுவனத்தின் சார்பில் தமிழ்நாடு, ஆந்திரா, கேரளா ஆகிய மாநிலங்களைச் சேர்ந்த 32 டீலர்கள் வியட்நாம் தீவுகளுக்குச் சுற்றுலா அழைத்துச் செல்லப்பட்டனர்.

அங்குள்ள ஒரு நடுக்கடல் தீவை நோக்கி அதிவேகப் படகில் பயணித்த போது, எதிர்பாராதவிதமாகப் படகு தலைகீழாகக் கவிழ்ந்ததில் 10 தமிழர்கள் உட்பட மொத்தம் 15 பேர் நீரில் மூழ்கித் துடிதுடித்து உயிரிழந்தனர்.

இந்த கொடூர விபத்தில் பலியான 10 தமிழர்களில் திருச்சியைச் சேர்ந்த லாவா செல்போன் விநியோகஸ்தரான அழகு ராஜனும் ஒருவர் என்ற அதிர்ச்சித் தகவல் தற்பொழுது அவரது குடும்பத்தினருக்குத் தெரியவந்துள்ளது.

தங்களது வீட்டுப் பிள்ளை வெளிநாடு சென்ற இடத்தில் விபத்தில் சிக்கி உயிரிழந்தார் என்ற செய்தி அறிந்ததும் அவரது குடும்பத்தினரும், உறவினர்களும் தற்பொழுது கண்ணீர் மல்கப் பெரும் சோகத்தில் மூழ்கியுள்ளனர்.

உயிரிழந்த அழகு ராஜனின் உடலைத் தாயகம் கொண்டு வருவதற்கான தூதரக நடவடிக்கைகளை மத்திய மற்றும் மாநில அரசுகள் உடனடியாக மேற்கொள்ள வேண்டும் என்று அவரது உறவினர்கள் தற்பொழுது கதறியபடி கோரிக்கை விடுத்து வருகின்றனர்.