ஆலம்கோடு பகுதியில், 6 வயது சிறுவனை நோக்கி தெருநாய் ஒன்று கொடூரமாகப் பாய்ந்து கடிக்க முயன்ற சம்பவம் பெரும் பதற்றத்தை ஏற்படுத்தியுள்ளது. வீட்டின் முன்பு நின்று கொண்டிருந்த அந்தச் சிறுவனை நாய் திடீரெனத் தாக்கியதில், சிறுவன் நிலைதடுமாறி கீழே விழுந்தான். இதைக் கண்ட அவனது மூத்த அண்ணன், சிறிதும் யோசிக்காமல் வீட்டின் முதல் மாடியிலிருந்து (மாடியின் மேல் தளத்திலிருந்து) கீழே குதித்து தம்பியைக் காப்பாற்ற ஓடிவந்துள்ளார். அதற்குள் சிறுவன் சுதாரித்துக்கொண்டு வீட்டுக்குள் ஓட, அங்கே அவனது தாயும் ஓடிவந்துள்ளார். இந்த பதைபதைக்கும் சம்பவத்தின் சிசிடிவி  காட்சிகள் தற்போது வெளியாகி சமூக வலைத்தளங்களில் வைரலாகி வருகின்றன.

 

தம்பியைக் காப்பாற்ற முயன்றபோது, அந்த தெருநாய் அண்ணனையும் விடாமல் கடிக்கப் பாய்ந்தது. உடனே அவர் ஒரு கம்பை எடுத்து நாயைத் தடுத்து அடித்துள்ளார். அண்ணன் அடித்த அடியில் நாய் மயக்கமடைந்து விழுந்தது. பின்னர் அவர் மற்றொரு பெரிய கம்பை எடுத்து வருவதற்குள், மயக்கம் தெளிந்து எழுந்த அந்த நாய், அவ்வழியாகச் சென்ற மற்றொரு பாதசாரியையும் கடித்துக் குதறியது. இதனால் ஆத்திரமடைந்த அப்பகுதி பொதுமக்கள், அந்த நாயை அடித்துக் கொன்றனர். இப்பகுதியில் தெருநாய்களின் தொல்லை நாளுக்கு நாள் அதிகரித்து வருவதாகவும், இதனால் பொதுமக்கள் வீட்டை விட்டு வெளியே வர அச்சப்படுவதாகவும் அப்பகுதி மக்கள் குற்றம் சாட்டியுள்ளனர்.