சத்தீஸ்கர் மாநிலம் சுக்மா மாவட்டத்தில் உள்ள ஒரு பழங்குடியின கிராம மக்கள், தங்கள் பகுதியில் உள்ள சாலைகளின் அவலநிலையைச் சுட்டிக்காட்டி மத்திய உள்துறை அமைச்சர் அமித் ஷாவிற்கு உருக்கமான கடிதம் ஒன்றை எழுதியுள்ளனர். “எங்கள் பகுதிக்குச் சாலை அமைக்க முடியாவிட்டால், அவசரகால மருத்துவத் தேவைகளுக்காகவாவது ஒரு ஹெலிகாப்டரை எங்களுக்கு வழங்குங்கள்” என்று அவர்கள் அக்கடிதத்தில் தங்களின் ஆதங்கத்தை வெளிப்படுத்தியுள்ளனர்.

மருகி கிராமத்தை இணைக்கும் 12 கிலோமீட்டர் நீளமுள்ள சாலை, கடந்த 10 ஆண்டுகளுக்கும் மேலாக முடிக்கப்படாமல் முடங்கிக் கிடப்பதாக கிராம மக்கள் குற்றம்சாட்டியுள்ளனர். இப்பணிக்கான ஒப்பந்தக்காரர்கள் ஆங்காங்கே பெரிய பள்ளங்களைத் தோண்டி, பாலங்கள் மற்றும் சிறுபாலங்களுக்கான கட்டுமானப் பணிகளைத் தொடங்கினர். ஆனால், அந்தப் பணிகளை பாதியிலேயே அப்படியே கிடப்பில் போட்டுவிட்டுச் சென்றுவிட்டனர்.

பள்ளம் தோண்டுவதற்காகக் கொண்டு வரப்பட்ட சரளைகளும், கற்களும் மண்பாதையெங்கும் சிதறிக்கிடக்கின்றன. இதனால், அந்தப் பாதையில் நடந்து செல்வது கூட தங்களுக்குப் பெரும் சிரமமாக மாறியுள்ளதாக மக்கள் வேதனை தெரிவிக்கின்றனர். சாதாரண நாட்களிலேயே இந்தச் சாலையில் பயணிப்பது கடினமாக உள்ள நிலையில், மழைக்காலங்களில் நிலைமை இன்னும் மோசமடைகிறது. தோண்டப்பட்ட பெரிய பள்ளங்களில் மழைநீர் தேங்கி நிற்பதால், ஒட்டுமொத்தப் போக்குவரத்தும் துண்டிக்கப்பட்டு நரக வேதனையை அனுபவித்து வருவதாக அவர்கள் குறிப்பிட்டுள்ளனர்.

போக்குவரத்து வசதி இல்லாததால், மருத்துவத் தேவைகளின் போது கிராம மக்கள் பெரும் தவிப்பிற்குள்ளாகின்றனர். குறிப்பாக, கர்ப்பிணிப் பெண்கள், முதியவர்கள் மற்றும் உயிருக்கு ஆபத்தான நிலையில் உள்ள நோயாளிகளைப் பிரதான சாலைக்குக் கொண்டு சேர்க்க, வேறு வழியின்றி அவர்களைக் கட்டிலில் படுக்கவைத்து, தோள்களில் சுமந்து செல்லும் அவலநிலை இன்றும் தொடர்கிறது.

இதுகுறித்து அக்கிராமத் தலைவர் பேசுகையில், “நாங்கள் மாவட்ட அதிகாரிகள் முதல் மாவட்ட ஆட்சியர் வரை அனைவரின் அலுவலக வாசல்களிலும் ஏறி இறங்கி மனுக்களைக் கொடுத்துவிட்டோம். ஒவ்வொரு முறையும் எங்களுக்கு வெறும் வாக்குறுதிகள் மட்டுமே கிடைக்கின்றனவே தவிர, களத்தில் எந்தவொரு முன்னேற்றமும் இல்லை. எங்கள் குறைகளைக் கேட்கக்கூட இங்கு யாரும் தயாராக இல்லை” எனத் தெரிவித்தார்.

சாலைப் பணிகள் முடிக்கப்படாமல் இருப்பதற்கு, அப்பகுதியில் உள்ள நக்சலைட் செயல்பாடுகளே காரணம் என அதிகாரிகள் தரப்பில் கூறப்பட்டு வருகிறது. ஆனால், தங்களின் பகுதி தற்போது ‘நக்சலைட்டுகள் இல்லாத பகுதி’ என அரசால் அதிகாரப்பூர்வமாக அறிவிக்கப்பட்டுள்ள நிலையில், இன்னும் ஏன் சாலை வசதிகள் செய்து தரப்படவில்லை என்று கிராம மக்கள் நியாயமான கேள்வியையும் எழுப்பியுள்ளனர். இறுதியாக, தங்களின் இந்த ‘ஹெலிகாப்டர்’ கோரிக்கை, நீண்டகாலமாக நிலுவையில் உள்ள சாலைப் பணிகளை விரைந்து முடிக்கவும், உள்கட்டமைப்பை மேம்படுத்தவும் அரசைத் தூண்டும் ஒரு வடிவமே என்று கிராம மக்கள் தங்களின் நம்பிக்கையை வெளிப்படுத்தியுள்ளனர்.