ஷீரடி – நகர் நெடுஞ்சாலையில் தொடர்ச்சியாக நடைபெற்று வரும் வாகன விபத்துகள் பொதுமக்களிடையே பெரும் அச்சத்தை ஏற்படுத்தியுள்ளது. இந்நிலையில், வியாழக்கிழமை இரவு நடைபெற்ற கோர விபத்தில் ராஹதாவைச் சேர்ந்த 12 வயது சிறுவன் பரிதாபமாக உயிரிழந்த சம்பவம் அப்பகுதியில் பெரும் கொந்தளிப்பை ஏற்படுத்தியுள்ளது.

அதாவது தீபக் கெய்க்வாட் என்பவரின் மகன் ஓம்கார் கெய்க்வாட் (12). ஏழாம் வகுப்பு படித்து வந்த இந்த சிறுவன், வியாழக்கிழமை இரவு சாலையைக் கடந்தபோது, அதிவேகமாக வந்த கார் ஒன்று அவன் மீது பலமாக மோதியது. இதில் பலத்த காயமடைந்த ஓம்கார், உடனடியாக லோனி மருத்துவமனைக்கும், பின்னர் மேல் சிகிச்சைக்காக நாசிக் மருத்துவமனைக்கும் கொண்டு செல்லப்பட்டான். இருப்பினும், சிகிச்சை பலனின்றி இன்று காலை அவன் உயிர் பிரிந்தது.

விபத்து நடந்து இரண்டு நாட்களாகியும், சம்பந்தப்பட்ட கார் ஓட்டுநரைக் கைது செய்ய போலீசார் எந்த நடவடிக்கையும் எடுக்கவில்லை எனத் தெரிகிறது. இதனால் ஆத்திரமடைந்த உறவினர்கள் மற்றும் பொதுமக்கள், ஓம்காரின் சடலத்தை நேரடியாக காவல் நிலையத்திற்கு எடுத்துச் சென்றனர். குற்றவாளியைக் கைது செய்யும் வரை சடலத்தைப் பெற்றுக்கொள்ள மாட்டோம் எனக்கூறி காவல் நிலைய வளாகத்திலேயே சடலத்தை வைத்து போராட்டத்தில் ஈடுபட்டதால் பெரும் பதற்றம் நிலவியது.

கார் தற்போது போலீசாரின் வசம் இருந்தாலும், ஓட்டுநர் இன்னும் தலைமறைவாகவே உள்ளார். செல்வாக்கு மிக்க நபர்களுக்கு போலீசார் ஆதரவாகச் செயல்படுவதாகப் போராட்டக்காரர்கள் குற்றம் சாட்டினர். தகவல் அறிந்து வந்த உயர் அதிகாரிகள், விரைந்து நடவடிக்கை எடுப்பதாக உறுதியளித்த பின்னரே நிலைமை சற்று சீரானது.

நெடுஞ்சாலையில் அதிகரித்து வரும் விபத்துகளைத் தடுக்கவும், அதிவேக வாகனங்களைக் கட்டுப்படுத்தவும் நிரந்தர தீர்வு காண வேண்டும் என அப்பகுதி மக்கள் கோரிக்கை விடுத்துள்ளனர். ஓம்காரின் மறைவு அப்பகுதியில் பெரும் சோகத்தை ஏற்படுத்தியுள்ளது.