ஈரான் மற்றும் ஓமான் நாடுகள் ஹார்முஸ் ஜலசந்தி தொடர்பாக ஒரு ரகசிய ஒப்பந்தத்தை மேற்கொண்டுள்ளது சர்வதேச அளவில் பெரும் கவனத்தைப் பெற்றுள்ளது. ஈரானின் வெளியுறவு அமைச்சர் அப்பாஸ் அராக்சி ஓமானுக்குப் பயணம் மேற்கொண்டபோது இந்த உடன்பாடு எட்டப்பட்டது.
ஹார்முஸ் ஜலசந்தி என்பது ஓமானுக்கும் ஈரானுக்கும் இடையில் அமைந்துள்ள மிக முக்கியமான கடல் வழிப்பாதையாகும். சமீபத்திய மோதல்களின் போது, ஈரான் இந்தப் பாதையில் வெடிமருந்துகளைப் புதைத்து கப்பல் போக்குவரத்தைத் தடை செய்திருந்தது.
தற்போது இந்தப் பாதையை மீண்டும் திறப்பது மற்றும் கப்பல்களின் பாதுகாப்பை உறுதி செய்வது குறித்து இரு நாடுகளும் சில முக்கிய முடிவுகளை எடுத்துள்ளதாகத் தெரிகிறது.
இந்த ஒப்பந்தத்தின் முழு விவரங்கள் அதிகாரப்பூர்வமாக வெளியிடப்படவில்லை என்றாலும், ஹார்முஸ் ஜலசந்தி வழியாகச் செல்லும் கப்பல்களுக்கு சுங்கக் கட்டணம் வசூலிப்பது குறித்து ஈரான் முன்மொழிந்ததாகக் கூறப்படுகிறது.
ஆனால், இயற்கையான கடல் பாதையில் கட்டணம் வசூலிப்பதை ஓமான் ஏற்கவில்லை. அதே சமயம், வளைகுடா பிராந்தியத்தில் நிலவும் பதற்றத்தைத் தணிக்கவும், கடல்சார் முற்றுகையை முழுமையாக நீக்கவும் ஓமான் விரும்புவதாக அந்நாட்டு வெளியுறவு அமைச்சர் தெரிவித்துள்ளார்.
இந்தப் போர்ச் சூழலுக்கு ஈரான் மட்டுமே காரணம் அல்ல என்று ஓமான் கருத்து தெரிவித்துள்ள நிலையில், இந்த ரகசிய ஒப்பந்தம் அமெரிக்கா உள்ளிட்ட நாடுகளுக்கு ஒரு முக்கியமான செய்தியாகப் பார்க்கப்படுகிறது.
