சென்னையில் பாரதிய ஜனதா கட்சியின் சார்பில் திமுக அரசுக்கு எதிரான குற்றப்பத்திரிகை வெளியீட்டு விழா இன்று நடைபெற்றது. தமிழக பாஜக மாநிலத் தலைவர் நயினார் நாகேந்திரன் இது குறித்துத் தனது சமூக வலைதளப் பக்கத்தில் விரிவான பதிவொன்றை வெளியிட்டுள்ளார்.

அதில் கடந்த 5 ஆண்டுகால திமுக ஆட்சியில் தமிழகத்தில் சட்டம் மற்றும் ஒழுங்கு சீர்கேடுகள் அதிகரித்துள்ளதாகவும் பெண்கள் மற்றும் குழந்தைகளுக்கு எதிரான குற்றங்கள் மலிந்துவிட்டதாகவும் அவர் குற்றம் சாட்டியுள்ளார்.

புனிதமான தமிழக மண்ணைப் போதை கலாச்சாரத்தின் மூலம் சீரழித்த செயல்களை விளக்கும் வகையில் குற்றவாளி கூண்டில் ஸ்டாலின் அரசு என்ற தலைப்பில் இந்தக் குற்றப்பத்திரிகை வெளியிடப்பட்டுள்ளதாக அவர் தெரிவித்துள்ளார்.

மத்திய வர்த்தகம் மற்றும் தொழில்துறை அமைச்சரும் தமிழகச் சட்டமன்றத் தேர்தல் பொறுப்பாளருமான பியூஷ் கோயல் தலைமையில் இந்த நிகழ்வு நடைபெற்றது. தமிழகத்தைப் பாதுகாப்பற்ற சூழ்நிலைக்குத் தள்ளிய திமுக அரசின் செயல்பாடுகளை மக்கள் மத்தியில் கொண்டு செல்வதே இதன் முக்கிய நோக்கம் என்று நயினார் நாகேந்திரன் குறிப்பிட்டுள்ளார்.

இந்த விழாவில் பாஜக மேலிடப் பொறுப்பாளர்கள் மற்றும் முக்கியத் தலைவர்களான அண்ணாமலை தமிழிசை சவுந்தரராஜன் வானதி சீனிவாசன் உள்ளிட்ட மாநில மற்றும் மாவட்ட நிர்வாகிகள் பலர் கலந்து கொண்டனர். தேர்தல் நெருங்கி வரும் வேளையில் தமிழக அரசின் மீதான இத்தகைய பகிரங்கக் குற்றச்சாட்டுகள் அரசியல் வட்டாரத்தில் பெரும் பரபரப்பை ஏற்படுத்தியுள்ளன.