சேலத்தில் நேற்று நடைபெற்ற மகளிர் தின விழாவில் அதிமுக பொதுச்செயலாளர் எடப்பாடி பழனிசாமி கலந்துகொண்டு, 40 கிலோ எடையுள்ள பிரம்மாண்ட கேக்கை வெட்டி உற்சாகமாகத் தொடங்கி வைத்தார். இந்த விழாவில் மாவட்டச் செயலாளர் இளங்கோவன் மற்றும் மகளிர் அணியைச் சேர்ந்த முக்கிய நிர்வாகிகள் பலர் பங்கேற்றனர்.

அப்போது செய்தியாளர்களிடம் பேசிய இபிஎஸ், அதிமுக ஆட்சிக்கு வந்ததும் குடும்பத் தலைவிகளுக்கு மாதம் 2,000 ரூபாய் வழங்கப்படும் என்றும், நிறுத்தப்பட்ட ‘அம்மா இருசக்கர வாகனத் திட்டம்’ மீண்டும் செயல்படுத்தப்பட்டு, 5 லட்சம் பெண்களுக்கு தலா 25,000 ரூபாய் மானியம் வழங்கப்படும் என்றும் முக்கிய வாக்குறுதிகளை அளித்தார்.

விஜய்யின் தமிழக வெற்றிக் கழகம் அதிமுகவின் திட்டங்களை நகலெடுப்பதாக எழுந்த கேள்விக்கு பதில் அளித்த அவர், ஒவ்வொரு கட்சியும் தங்களின் கொள்கைப்படி தேர்தல் அறிக்கையை வெளியிடுவார்கள் என்று முதிர்ச்சியுடன் தெரிவித்தார். மகளிர் உரிமைத் தொகையை முதலில் அறிவித்தது அதிமுகதான் என்றும், அதன் பின்னரே திமுக அதனைப் பின்பற்றியது என்றும் அவர் சுட்டிக்காட்டினார்.

மேலும், எம்ஜிஆர் மற்றும் ஜெயலலிதா காலத்திலிருந்தே அதிமுக பெண்களுக்கு ஏராளமான நன்மைகளைச் செய்துள்ளதாகவும், அந்த சாதனைகளை மக்களிடம் கொண்டு சேர்க்க வேண்டும் என்றும் அவர் வலியுறுத்தினார்.