18 வயதில் மகனைப் பராமரிக்க வேண்டிய நிலையில், பணமில்லாமல் தவித்த ரிக் சென்கோ என்ற தனித் தந்தை, பயன்படுத்தப்பட்ட ஆடைகளை விற்று இன்று ஆண்டுக்கு $6.5 மில்லியனுக்கும் (சுமார் ₹54 கோடி) மேல் வருவாய் ஈட்டி இணையத்தின் கவனத்தை ஈர்த்துள்ளார். 2008-ஆம் ஆண்டில், கையில் இருந்த $35-க்கு வாங்கிய செல்போனை eBay-யில் $75-க்கு விற்றதுதான் தனது வாழ்க்கையை மாற்றிய “Matrix-இல் ஒரு பிழை” போல உணர்ந்ததாக 41 வயதான சென்கோ கூறியுள்ளார். 5 ஆண்டுகள் CVS புகைப்பட ஆய்வக மேற்பார்வையாளராகப் பணியாற்றிய அவர், சர்க்யூட் சிட்டியில் (Circuit City) ஒரு வேலையில் சேர்ந்த இரண்டு வாரங்களில் அந்த நிறுவனம் திவால் ஆனதால், பழைய பொருட்களை விற்கும் தொழிலில் முழு மூச்சாக இறங்கினார். தினமும் 20 மணிநேரம் செலவிட்டு, பிராண்டுகள், சந்தைப்போக்குகள், விற்பனையாளர்களுடன் உறவுகளை ஏற்படுத்துவது என இந்தத் தொழிலின் நுணுக்கங்களைக் கற்றுக் கொண்டதாக அவர் தெரிவிக்கிறார்.

ஆரம்பத்தில் எலெக்ட்ரானிக்ஸ் மற்றும் போன்களை விற்று 2010-ஆம் ஆண்டுக்குள் $100,000-க்கு மேல் ஈட்டிய சென்கோ, பழைய துணிகள்தான் அதைவிடச் சிறந்த தொழில் வாய்ப்பு எனக் கண்டறிந்தார். “ஒரு குறிப்பிட்ட போலோ ரால்ஃப் லாரன் சட்டை கேமிங் கன்சோலை விட அதிக மதிப்புள்ளது என்பது பலருக்கும் தெரிவதில்லை” என்று அவர் கூறுகிறார். ஃபுளோரிடாவில் வசிக்கும் சென்கோ, அதிகாலையிலேயே புறப்பட்டுத் துணிக்கடைகள், சந்தைகள் ஆகிய இடங்களுக்குச் சென்று, விற்பனையாளர்களுடன் உறவை வளர்த்து, தரமான துணிகளைச் சேகரித்தார். இன்று, அவர் Technsports என்ற மொத்த விற்பனை நிறுவனத்தை நடத்தி வருகிறார். இது ஒரு நாளைக்கு 5,000 பயன்படுத்தப்பட்ட ஆடைகளை மற்ற தொழில்முறை மறுவிற்பனையாளர்களுக்கு விற்கிறது. 2024-ஆம் ஆண்டில் $6.5 மில்லியனுக்கும் அதிகமான வருவாய் ஈட்டிய இந்நிறுவனம், ஒவ்வொரு விற்பனையிலும் 50% இலாப வரம்பைப் பெறுவதாக சென்கோ கூறுகிறார். “நான் கிட்டத்தட்ட 20 வருடங்களாக ஒரு நாள் கூட விடுமுறை எடுத்ததில்லை. கோடிக்கணக்கில் விற்று மிகவும் அதிர்ஷ்டமான வாழ்க்கையை வாழ நான் கொடுத்த உழைப்பும் தியாகமும் மிகப் பெரியது,” என்று அவர் பெருமையுடன் கூறியுள்ளார்.