கடலூர் மாவட்டம் மலைஅடிகுப்பம் கிராமத்தில் ஆக்கிரமிப்பு நிலங்களில் இருந்த முந்திரி மரங்கள் இரண்டு மாதங்களுக்கு முன்னர் அரசு அதிகாரிகளால் வெட்டப்பட்டன. இதனை கண்டித்து, அந்த இடத்தில் மறுமுறையாக முந்திரி மரக் கன்றுகள் நடும் போராட்டத்தை மார்க்சிஸ்ட் கம்யூனிஸ்ட் கட்சி அறிவித்தது. இதனையடுத்து, அப்பகுதியில் பதற்றம் ஏற்படக்கூடும் என முன்னெச்சரிக்கையாக போலீசார் பெரிய அளவில் குவிக்கப்பட்டு, போராட்டத்திற்கு தடை செய்தனர்.

இந்த தடையை மீறி, முந்திரி கன்றுகள் நடும் விழாவில் கலந்து கொள்வதற்காக மலைஅடிகுப்பம் சென்ற மாநிலச் செயலாளர் பெ. சண்முகம் மற்றும் கட்சி தொண்டர்களை போலீசார் வழிமறித்து தடுத்து, கைது செய்தனர். இந்த சம்பவம் காரணமாக அந்த பகுதியில் சில நேரம் பதற்றம் நிலவியது. தற்போதும் பாதுகாப்பு கருதி போலீசார் கண்காணிப்பை தொடர்ந்துள்ளனர்.