துலீப் கோப்பை 2026 போட்டியில் கிழக்கு மண்டலம் மற்றும் மத்திய மண்டல அணிகள் மோதின. இதில் 15 வயதான இளம் வீரர் வைபவ் சூர்யவன்ஷி அதிரடியாக விளையாடி அனைவரின் கவனத்தையும் ஈர்த்தார். இருப்பினும், அவர் தனது சதத்தை நூலிழையில் தவறவிட்டது அணிக்குச் சிறிய பின்னடைவை ஏற்படுத்தியது.
வைபவ் மற்றும் அபிமன்யு ஈஸ்வரன் ஜோடி முதல் விக்கெட்டுக்குக் சிறப்பாக விளையாடி 161 ரன்கள் குவித்தது. அதிரடியாக ஆடிய வைபவ் 42 பந்துகளில் அரைசதம் அடித்தார். மழை குறுக்கிட்ட நிலையிலும், இருவரும் முதல் செஷனில் 23 ஓவர்களில் 123 ரன்கள் சேர்த்துச் சீரான வேகத்தில் ரன் உயர்த்தினர்.
சதத்தை எதிர்நோக்கிச் சிறப்பாக ஆடிக்கொண்டிருந்த வைபவ், ஹர்ஷ் துபே வீசிய பந்தைச் சிக்ஸர் அடிக்க முயன்றார். அப்போது எல்லைக்கோட்டில் நின்ற அர்ஷத் கான் அதனைப் கச்சிதமாகக் கேட்ச் பிடித்தார். இதனால் 81 பந்துகளில் 7 பவுண்டரிகள் மற்றும் 7 சிக்ஸர்களுடன் 92 ரன்கள் எடுத்திருந்த நிலையில் வைபவ் ஆட்டமிழந்தார்.
இதற்கு முன்னதாக மத்திய மண்டல அணி தனது முதல் இன்னிங்ஸில் 266 ரன்கள் எடுத்தது. அந்த அணியில் ரிங்கு சிங் 60 ரன்களும், ஏ. ஜுயல் 46 ரன்களும் எடுத்தனர். கிழக்கு மண்டலப் பந்துவீச்சாளர்களில் முகேஷ் குமார் மற்றும் ஏ. சர்க்கார் தலா 3 விக்கெட்டுகளையும், முகமது ஷமி மற்றும் எம். குரேஷி தலா 2 விக்கெட்டுகளையும் வீழ்த்தினர்.
இப்போட்டியில் 2 விக்கெட்டுகளை வீழ்த்தியதன் மூலம், முகமது ஷமி தொழில்முறை கிரிக்கெட்டில் 900 விக்கெட்டுகள் என்ற மகத்தான மைல்கல்லை எட்டினார். இச்சாதனையைச் செய்யும் 6-வது இந்திய வீரர் என்ற பெருமையை அவர் பெற்றுள்ளார்.
