தூத்துக்குடி மாவட்டம் எட்டயபுரம் அருகே 6 வயது சிறுவனை பாலியல் வன்கொடுமை செய்து கொலை செய்த வழக்கில், குற்றவாளிக்கு இரட்டை ஆயுள் தண்டனையை தூத்துக்குடி போக்சோ (POCSO) நீதிமன்றம் விதித்துள்ளது.

வடக்கு முத்தலாபுரம் பகுதியைச் சேர்ந்த அருண்ராஜ் (31) என்பவர், 2019-ம் ஆண்டு நிகழ்ந்த இந்த கொடூரமான சம்பவத்தில் ஈடுபட்டதாக எட்டயபுரம் போலீசாரால் கைது செய்யப்பட்டிருந்தார்.

வழக்கு தொடங்கியதிலிருந்து தொடர்ச்சியாக விசாரணை நடைபெற்றது. அனைத்து ஆதாரங்களும் பரிசீலிக்கப்பட்ட பிறகு, நீதிபதி சுரேஷ், அருண்ராஜ் மீது சாட்டப்பட்ட குற்றங்கள் அனைத்தும் நிரூபிக்கப்பட்டதாக தெரிவித்தார்.

இதையடுத்து, சிறுவனை கொலை செய்ததற்காக ஆயுள் தண்டனை மற்றும் ரூ.10,000 அபராதம், பாலியல் வன்கொடுமை குற்றத்திற்காக மேலும் ஒரு ஆயுள் தண்டனை மற்றும் ரூ.10,000 அபராதம், மேலும் போக்சோ சட்டத்தின் கீழ் வாழ்நாள் முழுவதும் கடுங்காவல் சிறைத்தண்டனையும் விதித்தார்.