உத்தரப் பிரதேச மாநிலம்  பாஜ்ராரி கிராமத்தைச் சேர்ந்தவர் ஹனீப் மன்சூரி. இவருக்கு மது அருந்தும் பழக்கமும், சூதாடும் பழக்கமும் தீவிரமாக இருந்தது. தன் தீய பழக்கங்களுக்காக அவர் தமக்குச் சொந்தமான நிலத்தின் பெரும்பகுதியை ஏற்கனவே விற்றுவிட்ட நிலையில், கடந்த சனிக்கிழமை இரவு வழக்கம் போல் அளவுக்கு அதிகமாக மது அருந்திவிட்டு வீட்டிற்கு வந்துள்ளார்.

கணவன் மீண்டும் குடித்துவிட்டு வந்ததைக் கண்டு அதிர்ச்சியடைந்த அவரது 8 மாதக் கர்ப்பிணி மனைவி மனிஷா, அதனைத் தட்டிக்கேட்டுள்ளார். இதனால் இருவருக்கும் இடையே கடுமையான வாக்குவாதம் வெடித்துள்ளது. வாக்குவாதம் முற்றிய நிலையில் ஆத்திரமடைந்த ஹனீப், வீட்டில் இருந்த அரிவாளை எடுத்து மனிஷாவின் தலை, உடல் மற்றும் கைகளில் சரமாரியாக வெட்டி அவரை மிகக் கொடூரமாகக் கொலை செய்தார். இந்தத் திடுக்கிடும் படுகொலைச் சம்பவத்தை அவர்களது 5 வயது மற்றும் 2 வயதுப் பிஞ்சுக் குழந்தைகள் இருவரும் தங்களது கண் முன்னே நேரில் கண்டு செய்வதறியாது உறைந்து போயினர்.

செய்த கொலையை மறைத்துத் தப்பிக்க முயன்ற ஹனீப், தானே நேரடியாகக் காவல்துறைக்குத் தொலைபேசி மூலம் தகவல் தெரிவித்துவிட்டு ஒரு பொய்க் கதையைக் கூறி தப்பியோட முயன்றார். ஆனால், அந்த இடத்திற்கு வந்த காவல்துறையினரிடம் கொலையாளி யார் என்பதை அந்த 5 வயது சிறுவன் மிகத் துணிச்சலாகப் போட்டுடைத்தான். “என் அம்மாவை என் அப்பா தான் அரிவாளால் வெட்டிக் கொன்றார், நான் என் கண்ணாலேயே பார்த்தேன்” என்று சிறுவன் அளித்த வாக்குமூலம் காவல்துறையினரைக் அதிரச் செய்தது.

இதனைத் தொடர்ந்து பன்வாரியிடம் நடத்தப்பட்ட தீவிர விசாரணையில் அவர் குற்றத்தை ஒப்புக்கொண்டதை அடுத்து உடனடியாகக் கைது செய்யப்பட்டார். கொல்லப்பட்ட மனிஷாவுக்கு கடந்த 2021-ஆம் ஆண்டு திருமணம் நடைபெற்ற நிலையில், கணவர் ஹனீப்பின் சந்தேகப் புத்தியால் அவர் தொடர்ந்து அடித்துத் துன்புறுத்தப்பட்டு வந்துள்ளார். பலமுறை வீட்டை விட்டுத் துரத்தப்பட்டாலும் குடும்பத்தின் எதிர்காலத்தைக் கருத்தில் கொண்டு மனிஷா எல்லாவற்றையும் பொறுத்துக்கொண்டு வாழ்ந்து வந்ததாக அவரது சகோதரர் நசீம் மன்சூரி கண்ணீருடன் தெரிவித்தார்.

மேலும், “என் மகன் மன்னிக்கவே முடியாத கொடூரக் குற்றத்தைச் செய்துவிட்டான்; அவனுக்கு நீதிமன்றம் தூக்கு தண்டனை வழங்கினாலும் தகும்” என்று ஹனீபின் தந்தை வேதனையுடன் கூறினார். தாய் இழந்த அந்த இரண்டு பச்சிளம் குழந்தைகளையும் இனி தாமே அரவணைத்து வளர்க்கப் போவதாகவும் அவர் தழுதழுத்த குரலில் தெரிவித்தார்.