திருப்பத்தூர் மாவட்டம் ஆம்பூர் பகுதியில் பிறந்து 9 நாட்களே ஆன பெண் குழந்தையை ரூ.1 லட்சத்திற்கு விற்பனை செய்த சம்பவம் அப்பகுதியில் பெரும் அதிர்ச்சியையும் அதிர்வலைகளையும் ஏற்படுத்தியுள்ளது. ஆம்பூரைச் சேர்ந்த தம்பதிக்கு அண்மையில் பிறந்த பெண் குழந்தையை, பணத்திற்காக இடைத்தரகர்கள் மூலமாக விற்பனை செய்யத் திட்டமிட்டுள்ளனர்.

​இதையறிந்த குழந்தைகள் நலத்துறை அதிகாரிகள் உடனடியாக காவல் துறையில் புகார் அளித்தனர். புகாரின் பேரில் தீவிர விசாரணை நடத்திய போலீசார், 10 ஆண்டுகளாகக் குழந்தை இல்லாமல் தவித்து வந்த பெங்களூரைச் சேர்ந்த தம்பதிக்கு, இந்த 9 நாள் பெண் குழந்தையை ரூ.1 லட்சத்திற்கு விற்பனை செய்ததைக் கண்டுபிடித்தனர்.

​இதனைத் தொடர்ந்து, பெற்ற பிள்ளையை விற்ற பெற்றோர் மற்றும் விற்பனைக்கு உடந்தையாக இருந்த இடைத்தரகர்கள் உட்பட மொத்தம் 4 பேரை காவல் துறையினர் அதிரடியாகக் கைது செய்தனர். மேலும், அவர்களிடம் இருந்து குழந்தை பாதுகாப்பாக மீட்கப்பட்டு குழந்தைகள் நல அமைப்பிடம் ஒப்படைக்கப்பட்டது. இச்சம்பவம் குறித்துப் போலீசார் தொடர்ந்து தீவிர விசாரணை நடத்தி வருகின்றனர்.