காவிரி டெல்டா பாசனத்திற்காக மேட்டூர் அணை திறக்கப்பட்ட போதிலும், நாகை மற்றும் திருவாரூர் மாவட்டங்களில் கிளைக் கால்வாய்களைத் தூர்வாரும் பணிகள் முழுமையடையாதது விவசாயிகளிடையே பெரும் கவலையை ஏற்படுத்தியுள்ளது. சேலம் முதல் தஞ்சை வரை உள்ள பன்னிரெண்டு மாவட்டங்களில் லட்சக்கணக்கான ஏக்கர் நிலங்கள் பாசன வசதி பெறும் என அறிவிக்கப்பட்டிருந்தாலும், கடைமடைப் பகுதி வரை தண்ணீர் தங்குதடையின்றிச் சென்று சேருமா என்பதில் சந்தேகம் எழுந்துள்ளது. குறிப்பாக நாகப்பட்டினம் மாவட்டத்தின் காவிரிகொண்டான் ஆற்றின் கிளைக் கால்வாய்களில் பணிகள் நிறைவுபெறாதது விவசாயிகளைத் திகைக்க வைத்துள்ளது.
இதேபோல் தஞ்சை மாவட்டத்திலும் அரசலாற்றில் தூர்வாரும் பணிகள் மேற்கொள்ளப்படாத காரணத்தால், ஆற்றின் பெரும்பகுதி முழுவதும் செடிகளும் புதர்களும் மண்டிப்போய்க் கிடப்பதாக விவசாயிகள் வேதனை தெரிவிக்கின்றனர். ஒன்றரை லட்சம் ஏக்கருக்கும் அதிகமான விவசாய நிலங்களின் நீராதாதாரமாக விளங்கும் இந்த ஆற்றைத் உடனடியாகத் தூர்வாரித் தடையற்ற நீர் விநியோகத்தை உறுதிப்படுத்த வேண்டும் எனத் தீவிரக் கோரிக்கைகள் விடுக்கப்பட்டு வருகின்றன .
மறுபுறம் திருவாரூர் மாவட்டத்திலுள்ள திருத்துறைப்பூண்டி மற்றும் அதனைச் சுற்றியுள்ள கிராமங்களில் முப்பது ஆயிரத்திற்கும் மேற்பட்ட விளை நிலங்களுக்குப் பக்கபலமாக இருக்கும் மரைக்கா கோரையாறானது கடந்த இருபது ஆண்டுகளாகத் தூர்வாரப்படாமல் பரிதாப நிலையில் உள்ளது. பாசன நீரை நம்பிப் பயிர்களை இறக்கியுள்ள டெல்டா பகுதி விவசாயிகள், அரசு விரைந்து களமிறங்கித் தூர்வாரும் பணிகளை முடுக்கிவிட வேண்டும் என்பதே தங்களின் தற்போதைய எதிர்பார்ப்பாக முன்வைத்துள்ளனர்.
