ஓடிஷா மாநிலம் மலகான்கிரி மாவட்டத்தில் உள்ள கொருகொண்டா கிராமத்தைச் சேர்ந்த பிரதீப் தித்தமர் என்பவர், வெள்ளிக்கிழமை காலை அருகிலுள்ள சந்தையில் இருந்து புதிய ஸ்டீல் பாத்திரம் ஒன்றை வாங்கி வீட்டிற்கு வந்தார். அப்போது அவரது 3 வயது மகன், அந்த பாத்திரத்துடன் விளையாடிக்கொண்டிருந்தார். விளையாட்டு முடிவில், தலையை பாத்திரத்தில் வைத்த சிறுவன், திடீரென அதில் சிக்கிக்கொண்டார். சிறுவன் கதறி அழுததும், பெற்றோர் பலமுறை முயற்சி செய்தும் தலை வெளியே வரவில்லை.

அதையடுத்து, சிறுவனை கொருகொண்டா தீயணைப்பு நிலையம் கொண்டுசென்று உதவி கேட்டனர். ஆனால் சம்பவம் சிக்கலானதால், மலகான்கிரி தீயணைப்பு நிலையத்திற்கு சிறுவனை அழைத்துச் சென்றனர். அங்கு தீயணைப்பு வீரர்கள்  சிறப்பு கருவியின் உதவியுடன், சுமார் 2 மணி நேரத்துக்கும் மேல் சிரமத்துடன்  செயல்பட்டு, பாத்திரத்தை வெட்டி சிறுவனை பாதுகாப்பாக மீட்டனர். இந்த மீட்பு நடவடிக்கையின் போது சிறுவனுக்கு எந்தவித காயமும் ஏற்படவில்லை என்பது மிகுந்த நிம்மதியளிக்கிறது.

இந்த சம்பவத்தின் புகைப்படங்கள் சமூக வலைதளங்களில் வைரலாக பரவி வருகின்றன. சிறுவனை மீட்ட தீயணைப்பு வீரர்களின் முயற்சி, பொறுப்பு மற்றும் செயல்திறன் குறித்து மக்கள் பாராட்டி வருகின்றனர். ஒரு சிறுவனின் உயிரை துல்லியமான திட்டமிடலுடன் காப்பாற்றிய வீரர்களுக்கு, பலரும் நன்றி தெரிவித்தும் பாராட்டும் தெரிவித்துள்ளனர். இது போன்ற அவசர நிலைகளில் தீயணைப்பு துறையின் செயல்பாடு மக்களின் நம்பிக்கையை மீண்டும் வலிமைப்படுத்தியுள்ளது