தூங்கும் போது திடீரென ஒரு பாறையிலிருந்து கீழே விழுவது போல உணர்ந்து, ஒரு சிறு அதிர்ச்சியுடன் விழிப்பது ‘ஹிப்னிக் ஜெர்க்’ என்று அழைக்கப்படுகிறது. இது தூக்கத்தின் ஆரம்ப நிலையில் உடலில் ஏற்படும் திடீர் தசை பிடிப்பு ஆகும்.
உடல் உண்மையில் கீழே விழுவதாக மூளை தவறுதலாக உணரும்போது இது நிகழ்கிறது. இந்தக் குழப்பமான அனுபவம் பாதிப்பில்லாதது என்றாலும், மன அழுத்தம், அதிக காஃபின் அல்லது தூக்கமின்மை போன்ற சில பிரச்சனைகளின் வெளிப்பாடாகவே இவை அதிகரிக்கக் கூடும் என்பதால் கவனம் தேவை.
மேலும், பலருக்கும் கீழே விழுவது போன்ற கனவுகள் வருவது பயமுறுத்துவதாக இருந்தாலும், நிபுணர்கள் இந்தக் கனவுகள் சீரற்றவை அல்ல என்று கூறுகிறார்கள். உளவியலாளர்களின் கூற்றுப்படி, கீழே விழுவது போன்ற கனவுகள் பெரும்பாலும் நம்முடைய மன அழுத்தம், பயம் அல்லது வாழ்க்கையில் கட்டுப்பாட்டை இழப்பதைப் பிரதிபலிக்கின்றன.
ஒரு புதிய வேலை, உறவுகளில் மாற்றம், அல்லது ஒரு முக்கியமான முடிவெடுக்கும் நேரம் போன்ற நம்மால் கட்டுப்படுத்த முடியாத சூழ்நிலைகளில் இது போன்ற கனவுகள் வரக்கூடும். “நாம் பிடித்துக் கொள்ள முயலும் விஷயங்கள் நம் கைகளில் இருந்து சரிந்துவிடுமோ” என்ற உள்ளார்ந்த அச்சத்தையே இது பிரதிபலிக்கிறது. மீண்டும் மீண்டும் இந்தக் கனவுகள் வரும்போது, ‘சற்று நிதானித்து செல்’ என்று மனம் எச்சரிக்கை விடுப்பதாகவே எடுத்துக்கொள்ள வேண்டும். படுக்கைக்குச் செல்லும் முன் மன அழுத்தத்தைக் குறைக்கும் பழக்கங்களைப் பின்பற்றுவது இதற்கு உதவும்.
