ஒவ்வொரு ஆண்டும் ஜூன் மாதத்தின் மூன்றாவது ஞாயிற்றுக்கிழமை உலகெங்கும் மிகவும் கோலாகலமாகக் கொண்டாடப்படும் ‘தந்தையர் தினம்’ (Father’s Day), நாம் நினைப்பது போல வெறும் வியாபார நோக்கத்திற்காகவோ அல்லது சாதாரண நாளாகவோ உருவாகவில்லை; மாறாக இதன் பின்னணியில் பல ஆழமான ஆன்மிக நிகழ்வுகளும், நெஞ்சை உருக்கும் வரலாற்றுச் சோகங்களும் மறைந்துள்ளன.

ஹிஸ்டரி (History) ஊடகம் வெளியிட்டுள்ள சிறப்புச் செய்தியின்படி, அமெரிக்காவில் இந்தத் தந்தையர் தினம் அதிகாரப்பூர்வமாகத் தொடங்குவதற்குக் பல நூற்றாண்டுகளுக்கு முன்பே, கத்தோலிக்கக் கிறிஸ்தவர்கள் இயேசு கிறிஸ்துவின் வளர்ப்புத் தந்தையான புனித ஜோசப்பை பெருமைப்படுத்தும் வகையில் மார்ச் 19-ஆம் தேதியை ‘புனித ஜோசப் தினமாக’ கொண்டாடி வந்துள்ளனர்.

அதேபோல், அமெரிக்காவின் வரலாற்றிலேயே மிக மோசமானதாகக் கருதப்படும் 1907-ஆம் ஆண்டு வெஸ்ட் வர்ஜீனியா நிலக்கரி சுரங்க விபத்தில் 362-க்கும் மேற்பட்ட தொழிலாளர்கள் பலியான சோகத்தைத் தொடர்ந்து, கிரேஸ் கோல்டன் கிளேட்டன் என்ற பெண்மணி தனது தந்தை உள்ளிட்ட உயிரிழந்த தந்தைமார்களின் நினைவாகச் சர்ச்சில் ஒரு சிறப்பு பிரார்த்தனை வழிபாட்டை 1908-ல் முதன்முதலாக நடத்தினார்.

இதனைத் தொடர்ந்து, 1909-ல் வாஷிங்டனைச் சேர்ந்த சோனோரா ஸ்மார்ட் டோட் என்ற பெண், தாயில்லாத தங்களை ஒற்றை ஆளாக வளர்த்து ஆளாக்கிய தனது தியாகத் தந்தையான வில்லியம் ஜாக்சன் ஸ்மார்ட்டை கௌரவிக்க ஏன் ஒரு நாள் இருக்கக் கூடாது என்ற உன்னத நோக்கில் ஒரு மெகா பிரச்சாரத்தைத் தொடங்கினார்.

இவரது தொடர் முயற்சியால் 1910 ஜூன் 19 அன்று வாஷிங்டனில் உள்ள பல்வேறு சர்ச்சுகளில் தந்தையர் தினம் வெகுவிமரிசையாகக் கொண்டாடப்பட்டு, ஊடகங்கள் மூலம் உலகெங்கும் பரவத் தொடங்கியது. அதிபர் உட்ரோ வில்சன் மற்றும் அதிபர் கால்வின் கூலிட்ஜ் போன்ற தலைவர்கள் இத்திட்டத்திற்கு ஆதரவு அளித்த போதிலும், பல ஆண்டுகள் போராட்டத்திற்குப் பிறகே 1966-ல் அதிபர் லிண்டன் பி. ஜான்சன் இதற்கு முதல் அங்கீகாரம் வழங்கினார்; பின்னர் 1972-ல் அதிபர் ரிச்சர்ட் நிக்சன் இதற்கான அதிகாரப்பூர்வ அரசாணைக்குக் கையெழுத்திட்டு, தந்தையர் தினத்தை அமெரிக்காவின் தேசிய விடுமுறை நாளாகவும், உலகளாவிய கொண்டாட்ட நாளாகவும் மாற்றினார்.

ஆன்லைன் மற்றும் சோசியல் மீடியாக்களில் தற்போது வைரலாகி வரும் இந்த வரலாற்றுப் பின்னணி, தந்தையர் தினக் கொண்டாட்டங்களுக்குப் பின்னால் இருக்கும் உண்மையான பாசத்தையும் ஆன்மிகத்தையும் உலகிற்குப் பறைசாற்றுவதாக அமைந்துள்ளது.