ஜெய்ப்பூரில் ஜெர்மனி நாட்டைச் சேர்ந்த பெண் சுற்றுலாப் பயணியிடம் ஆட்டோ ஓட்டுநர் ஒருவர் தகாத முறையில் நடந்து கொண்ட சம்பவம் பெரும் அதிர்ச்சியை ஏற்படுத்தியுள்ளது. அந்தப் பெண் தனது ஆட்டோவில் பயணம் செய்தபோது, போக்குவரத்து நெரிசலைப் பயன்படுத்தி, அவருக்குத் தெரியாத இந்தி மற்றும் உருது மொழிகளில் மிகவும் ஆபாசமான மற்றும் தரக்குறைவான வார்த்தைகளைக் கூறி, அதனைத் திரும்பச் சொல்லுமாறு அந்த ஓட்டுநர் வற்புறுத்தியுள்ளார்.

மேலும் அந்தப் பெண் அந்த வார்த்தைகளின் அர்த்தம் புரியாமல் அவர் சொன்னதை அப்படியே திரும்பக் கூறும் காட்சிகள் சமூக வலைதளங்களில் வைரலாகி, பொதுமக்களிடையே கடும் கோபத்தை ஏற்படுத்தியது. இந்த விவகாரம் குறித்து காவல்துறையினர் தீவிர விசாரணை மேற்கொண்டதில், சம்பந்தப்பட்ட ஆட்டோ ஓட்டுநர் அடையாளம் காணப்பட்டு உடனடியாகக் கைது செய்யப்பட்டார்.

இதனால் வெளிநாட்டுச் சுற்றுலாப் பயணிகளின் பாதுகாப்பை உறுதி செய்யவும், இந்தியாவின் நற்பெயருக்குக் களங்கம் விளைவிக்கும் இத்தகைய செயல்களைத் தடுக்கவும் கடும் நடவடிக்கை எடுக்கப்படும் என ஜெய்ப்பூர் காவல்துறை தெரிவித்துள்ளது.

இந்நிலையில் ராஜஸ்தான் சுற்றுலாத் துறையும் இச்சம்பவத்திற்கு வருத்தம் தெரிவித்துள்ளதோடு, பயணிகளின் பாதுகாப்பிற்காகப் புதிய வழிகாட்டுதல்களை அமல்படுத்தத் திட்டமிட்டுள்ளது. இந்தச் சம்பவம் சுற்றுலாத் தலங்களில் பெண்களின் பாதுகாப்பு குறித்த கேள்விகளை மீண்டும் எழுப்பியுள்ளது.