தமிழகத்தில் உள்ள அனைத்துப் பள்ளிகளையும் நேரடியாக ஆய்வு செய்து, அவற்றின் கட்டிடப் பாதுகாப்பை உறுதிசெய்யும் வகையில் கட்டிடங்கள் மூன்று வகைகளாகப் பிரிக்கப்பட உள்ளதாக அமைச்சர் ஆதவ் அறிவித்துள்ளார். மாணவர்களின் உயிர்ப் பாதுகாப்பை முதன்மையாகக் கொண்டு செயல்படுத்தப்பட உள்ள இந்த திட்டத்தின் மூலம், பள்ளிக் கட்டிடங்களுக்குச் சிவப்பு, மஞ்சள் மற்றும் பச்சை என மூன்று வண்ணக் குறியீடுகள் வழங்கப்பட உள்ளன.
இதில் சிவப்பு நிறக் குறியீடு வழங்கப்படும் கட்டிடங்கள், மாணவ-மாணவிகள் பயன்படுத்த முற்றிலும் தடை செய்யப்பட்ட ஆபத்தான கட்டிடங்களாகக் கருதப்பட்டு உடனடியாகச் சீல் வைக்கப்படும். அதேபோல, மஞ்சள் நிறக் குறியீடு பெறக்கூடிய கட்டிடங்கள் உடனடியாகப் பராமரிப்பு மற்றும் சீரமைப்புப் பணிகள் தேவைப்படுபவை எனக் கண்டறியப்பட்டு, அதற்கான புனரமைப்பு வேலைகள் உடனுக்குடன் முடுக்கிவிடப்படும்.
மூன்றாவதாக, பச்சை நிறக் குறியீடு பெறக்கூடிய கட்டிடங்கள் மிகவும் பலமாகவும், அடுத்த 5 ஆண்டுகளுக்கு எந்தவிதப் பிரச்சனையும் இல்லாமல் மாணவர்கள் பாதுகாப்பாகப் படிப்பதற்கு ஏற்றதாகவும் சான்றளிக்கப்படும். பள்ளிக் கட்டிடங்களின் தரம் மற்றும் பாதுகாப்பை உறுதி செய்ய அரசு எடுத்துள்ள இந்த கலர் கோடிங் நடவடிக்கை கல்வித் துறையில் பெரும் வரவேற்பைப் பெற்றுள்ளது.
மேலும், தனியார் பள்ளி மற்றும் கல்லூரிகளுக்கு இணையான உள்கட்டமைப்பு மற்றும் தரத்துடன் அரசுப் பள்ளி, கல்லூரிகள் இயங்க வேண்டும் என்பதே முதலமைச்சரின் முதன்மையான குறிக்கோள் என்று அமைச்சர் ஆதவ் தெரிவித்துள்ளார். அரசின் இந்த அதிரடி ஆய்வும், ஆபத்தான கட்டிடங்களுக்குச் சீல் வைக்கும் திட்டமும் பெற்றோர்கள் மற்றும் சமூக ஆர்வலர்களிடையே பெரும் நிம்மதியை ஏற்படுத்தியுள்ளது.
