உத்தரபிரதேச மாநிலத்தின் பராபங்கியில் உள்ள சரஸ்வதி வித்யா மந்திர் இன்டர் கல்லூரியில் 11-ம் வகுப்பு படித்து வந்த 16 வயது மாணவி நந்தினி, வகுப்பில் படித்துக்கொண்டிருந்தபோது திடீரென மயங்கி விழுந்து உயிரிழந்தார். சம்பவம் நேர்ந்ததும் பள்ளி ஆசிரியர்கள் அவளுக்கு உடனடி உதவி அளித்து மாவட்ட மருத்துவமனைக்கு அழைத்துச் சென்றனர். ஆனால் மருத்துவர்கள், மாணவி மருத்துவமனைக்குச் செல்லும் முன்பே உயிரிழந்துவிட்டதாக தெரிவித்தனர். மாணவிக்கு மருத்துவர்கள் மாரடைப்பு ஏற்பட்டிருக்கலாம் என சந்தேகிக்கின்றனர். மரணத்திற்கான தெளிவான காரணம் பிரேத பரிசோதனை அறிக்கைக்குப் பிறகே தெரியும் எனவும் மருத்துவமனை அதிகாரிகள் தெரிவித்துள்ளனர்.

மாணவியின் தந்தை ரஜிதா ராம் கூறுகையில், “நந்தினி காலை முழுக்க சுறுசுறுப்பாக இருந்தார். அவள் எந்த உடல்நலக் கோளாறும் இல்லாமல் பள்ளிக்கு சென்றார்,” என்றார். பள்ளி முதல்வர் சைலேந்திர சிங் மற்றும் வகுப்பு தோழர்களும் இதையே உறுதி செய்கின்றனர். கணிதம் பாடம் முடிந்து ஆறாவது மணி நடந்து கொண்டிருந்தபோது நந்தினி திடீரென மயக்கமடைந்து தரையில் விழுந்ததாக கூறப்படுகிறது. அவரது மரணம் மாணவிகள், ஆசிரியர்கள் மற்றும் குடும்பத்தினரிடையே மிகுந்த அதிர்ச்சியையும் துயரத்தையும் ஏற்படுத்தியுள்ளது.

இதனிடையே, கடந்த ஜூலை 1-ஆம் தேதி பராபங்கியில் உள்ள செயிண்ட் அந்தோணி பள்ளியில் 7-ம் வகுப்பு மாணவர் அகில் சிங் திடீரென தந்தையின் மடியில் உயிரிழந்தது குறிப்பிடத்தக்கது. வெறும் 18 நாட்களுக்குள் பராபங்கி நகரில் மாணவர்கள் இருவரும் வகுப்பின்போதே உயிரிழந்த சம்பவங்கள், கல்வித்துறையிலும், பெற்றோர்களிடமும் மிகுந்த கவலையை ஏற்படுத்தியுள்ளன. இந்த மர்ம மரணங்கள் தொடருவது தொடர்பாக போலீசார் தற்போது விசாரணை நடத்தி வருகின்றனர்.