கடந்த ஆண்டு ஆகஸ்ட் 15-ம் தேதி, நாடே சுதந்திர தினத்தைக் கொண்டாடிக்கொண்டிருந்த போது, பாட்னாவில் 7 வயது சிறுமி சாட்சியும், 6 வயது சிறுவன் தீபக்கும் ஒரு காருக்குள் சடலமாகக் கண்டெடுக்கப்பட்டனர். டியூஷன் படிக்கச் சென்ற குழந்தைகள் வீடு திரும்பாத நிலையில், ஒரு காருக்குள் உடல் கருகிய நிலையில் அவர்கள் மீட்கப்பட்டது பெரும் அதிர்ச்சியை ஏற்படுத்தியது. இது விபத்து என்று போலீஸ் தரப்பில் சொல்லப்பட்டாலும், குழந்தைகளின் உடலில் காயங்களும் தீக்காயங்களும் இருந்ததால், இது திட்டமிட்ட கொலை என்று அவர்களின் தாய் கிரண் தேவி குற்றம் சாட்டுகிறார். டியூஷன் மாஸ்டர் மீதே தங்களுக்குச் சந்தேகம் இருப்பதாக அவர் கண்ணீர் மல்கக் கூறுகிறார்.
ஐந்து மாதங்கள் கடந்தும் இந்த வழக்கில் இன்னும் உண்மை வெளிவரவில்லை. வறுமையில் வாடும் கிரண் தேவி, தனது குழந்தைகளுக்காக நீதி கேட்டுப் போராடி வருகிறார். போலீஸ் விசாரணையில் தொய்வு ஏற்பட்டுள்ளதாகவும், ஏழைகள் என்பதால் தங்களுக்கு நீதி மறுக்கப்படுவதாகவும் அவர் வேதனைப்படுகிறார். தற்போது உயிருக்கு அஞ்சி பாட்னாவை விட்டு வெளியேறித் தஞ்சம் புகுந்துள்ள அந்தத் தாய், “என் பிள்ளைகள் செய்த பாவம் என்ன?” என்ற ஒற்றைக் கேள்வியோடு நீதிமன்றக் கதவுகளைத் தட்டிக்கொண்டிருக்கிறார். ஒரு பக்கம் நீதிபதியின் மனைவிக்கே பாதுகாப்பு இல்லாத சூழலும், காவல் நிலையத்திலிருந்தே லாரிகள் மாயமாகும் அவலமும் பீகாரில் தொடர்வது மக்களிடையே பெரும் கொந்தளிப்பை ஏற்படுத்தியுள்ளது.
