2023 ஒருநாள் உலகக் கோப்பை இறுதிப்போட்டியில் ஆஸ்திரேலியாவிடம் ஏற்பட்ட தோல்வி, தன்னை மனதளவில் கடுமையாக பாதித்ததாக இந்திய கிரிக்கெட் அணியின் கேப்டன் ரோகித் சர்மா தெரிவித்தார்.

ஞாயிற்றுக்கிழமை நடைபெற்ற ஒரு நிகழ்ச்சியில் கலந்து கொண்டு பேசிய அவர், அந்தத் தோல்விக்குப் பிந்தைய மனநிலையை வெளிப்படையாக பகிர்ந்து கொண்டார்.

“தொடர்ச்சியாக 9 போட்டிகளில் வெற்றி பெற்று, கோப்பை கைக்கு எட்டும் தூரத்தில் இருந்த நிலையில் இறுதிப்போட்டியில் தோல்வி அடைந்தது என்னை முற்றிலும் உடைத்துவிட்டது. உடலில் எந்தத் தெம்பும் இல்லை. கிரிக்கெட்டையே வெறுத்துப்போன நிலை ஏற்பட்டது. பேட்டை எடுக்கவே வேண்டாம் என்று நினைத்தேன். ஓய்வு பெற்றுவிடலாம் என்ற எண்ணமும் வந்தது,” என்று ரோகித் கூறினார்.

மேலும் அவர், “2022-ல் இந்திய அணியின் கேப்டனாக பொறுப்பேற்றதிலிருந்தே, என் ஒரே கனவு ஒருநாள் உலகக் கோப்பை வெல்வதுதான். அது நிறைவேறாதபோது, வாழ்க்கையே முடிந்துவிட்டது போல உணர்ந்தேன். அந்தத் தோல்வியிலிருந்து மீண்டு வர பல மாதங்கள் ஆனது,” என்றார்.

அத்துடன், மீண்டும் களத்துக்கு திரும்ப எடுத்த முடிவைப் பற்றியும் ரோகித் விளக்கினார்.

“எனக்கு இன்னும் ஒரு வாய்ப்பு இருக்கிறது, அதை விட்டுவிடக்கூடாது என்று எனக்குள் நான் உறுதியெடுத்தேன். அதுதான் மீண்டும் விளையாட ஊக்கம் தந்தது,” என்றார்.

அந்த மன உறுதியின் பலனாக, 2024-ல் அமெரிக்காவில் நடைபெற்ற டி20 உலகக் கோப்பையில் இந்திய அணி வெற்றி பெற்று சாம்பியன் பட்டத்தை கைப்பற்றியது குறிப்பிடத்தக்கது.

தற்போது டெஸ்ட் மற்றும் டி20 போட்டிகளில் இருந்து ஓய்வு பெற்றுள்ள ரோகித் சர்மா,

“2027 ஒருநாள் உலகக் கோப்பை தான் எனது கடைசி கனவு. இன்னொரு முறை முயற்சி செய்து பார்க்க வேண்டும்,” என தனது ஆசையை வெளிப்படுத்தினார்.

உலகக் கோப்பை தோல்வி ஒரு முடிவல்ல; அது அடுத்த வெற்றிக்கான பாடம் என்பதைக் ரோகித் சர்மா மீண்டும் நிரூபித்துள்ளார்.