பொள்ளாச்சி பகுதியில், வாகனங்களை மாத வாடகைக்கு எடுத்து, வாடகையை கொடுக்காமலும், வாகனத்தையும் திருப்பிக்கொடுக்காமலும் மோசடி செய்யும் நபர்கள் தொடர்பாக புகார்கள் வெளியாகியுள்ளன. இந்த மோசடியால் பாதிக்கப்பட்டவர்கள், பொள்ளாச்சி காவல் துணை கண்காணிப்பாளர் அலுவலகத்திலும், காவல் நிலையத்திலும் மனு அளித்து நீதிகேட்டுள்ளனர்.

முறையாக வாடகைக்கு வழங்கப்படும்  வாகனங்களை குற்றவாளிகள் திட்டமிட்டு பெற்றுக்கொண்டு, பல மாதங்களாக  வாடகை பணத்தை செலுத்தாமல் உள்ளதாகவும், வாகனங்களை மீண்டும் சொந்தர்களிடம் ஒப்படைக்காதிருப்பதாகவும் கூறப்படுகிறது. குறிப்பாக, வண்டி ஸ்டாண்ட்களில் நிற்கும் பயன்படுத்தப்படாத வாகனங்களை கவனித்து, அவற்றின் சொந்ததாரரை நெருக்கமாக நெருங்கி, “மாதம் ₹3,000 வரைக்கும் வாடகை தருகிறேன்” என நம்ப வைத்துவிட்டு, ₹2,000 முதல் ₹5,000 வரை அட்வான்ஸாக பெற்றுக் கொண்டு வாகனங்களை பெற்று செல்கிறார்கள்.

இந்த மோசடிகள் நடந்து பல மாதங்கள் கடந்தும், வண்டிகளைத் திருப்பிக் கொடுக்காததுடன், வாடகை தொகையும் செலுத்தப்படாமல் இருப்பதால், வாகன உரிமையாளர்கள் கடும் பாதிப்புக்கு ஆளாகி உள்ளனர். தற்போது இந்த மோசடியால் பாதிக்கப்பட்டவர்கள் பலர், தங்களது சொந்த வாகனங்களை திரும்ப பெற முடியாமல் மன உளைச்சலுக்குள்ளாகியுள்ளனர். இந்நிலையில், போலீசார் இந்த முறைகேடுகளை தீவிரமாக விசாரித்து, குற்றவாளிகளை கைது செய்து உரிய நடவடிக்கை எடுக்க வேண்டும் என பொதுமக்கள் வலியுறுத்தி வருகின்றனர்.