மயிலாடுதுறையில் உள்ள மின் சாதனப் பொருட்கள் பழுது நீக்கும் ஒரு கடையில் ஏற்பட்ட திடீர் கம்ப்ரசர் வெடிப்பு சம்பவம் ஒருவர் உயிரிழப்பிற்கு காரணமாகியுள்ளது. மேலும் ஒருவர் உயிருக்கு ஆபத்தான நிலையில் தீவிர சிகிச்சை பெற்று வருகின்றார். வெடித்த கம்ப்ரசர், பழுது நீக்கும் பணியின் போது அதிக வெப்பம் காரணமாக வெடித்ததாக சந்தேகம் எழுந்துள்ளது.

மயிலாடுதுறை கூறைநாடு திருமஞ்சன வீதியைச் சேர்ந்த பாலாஜி (வயது 53) என்பவர், நகரில் உள்ள காமராஜர் பேருந்து நிலையம் அருகே ஏ.சி., பிரிட்ஜ் உள்ளிட்ட மின் சாதனங்கள் பழுது பார்ப்பதற்கான கடை நடத்தி வந்தார். அவருடன் கணேஷ் (வயது 26) என்ற தொழிலாளியும் வேலை பார்த்து வந்தார். நேற்று மதியம், ஒரு பழுதடைந்த பிரிட்ஜில் பழுது நீக்கும் பணியில் ஈடுபட்டிருந்தபோது, அதனுடன் இணைக்கப்பட்டிருந்த கம்ப்ரசர் திடீரென பயங்கர சத்தத்துடன் வெடித்தது.

வெடிப்பில் கடை உரிமையாளர் பாலாஜி தலையில் கடுமையாக காயம் அடைந்தார். அருகில் இருந்த கணேஷுக்கும் பலத்த காயம் ஏற்பட்டது. இதனைக் கண்ட  உடனடியாக இருவரையும் 108 ஆம்புலன்ஸ் மூலம் மயிலாடுதுறை அரசு மருத்துவமனைக்கு கொண்டு சென்றனர். மருத்துவர்கள் பரிசோதனை செய்தபோது, பாலாஜி ஏற்கனவே உயிரிழந்ததாக தெரிவித்தனர். கணேஷ் தற்போது தீவிர சிகிச்சைப் பிரிவில் சிகிச்சை பெற்று வருகிறார்.

இந்த சம்பவம் தொடர்பாக மயிலாடுதுறை காவல்துறையினர் வழக்குப் பதிவு செய்து விசாரணை மேற்கொண்டு வருகின்றனர். குறைந்த பாதுகாப்புடன் மின் சாதனங்களை பழுது பார்ப்பது உயிருக்கு ஆபத்தை ஏற்படுத்தக்கூடும் என்பதற்கான முக்கிய எடுத்துக்காட்டு இதுவாகும். பொதுமக்கள் மற்றும் தொழிலாளர்கள் இதுபோன்ற பணிகளில் முன்னெச்சரிக்கையாக இருக்க வேண்டியதைக் குறிக்கும் சம்பவமாக இது காணப்படுகிறது.