திபெத் பகுதியை தன் கட்டுப்பாட்டில் வைத்திருக்கும் சீனா, பிரம்மபுத்திரா நதியின் தண்ணீரை தன் வறட்சியான பகுதிகளுக்கு திருப்பும் திட்டங்களை நீண்ட நாட்களாக செயல்படுத்தி வருகிறது.

தற்போது, உலகின் மிகப்பெரிய அணையை பிரம்மபுத்திரா நதியின் குறுக்கே கட்டும் திட்டத்தில் சீனா இறங்கியுள்ளது. இதன்மூலம் 60,000 மெகாவாட் திறனுடைய நீர்மின் உற்பத்தி திட்டம் உருவாக இருக்கிறது. இது சீனாவின் உள்நாட்டு பாதுகாப்பும், நீர்வள மேலாண்மையும் என்பவற்றுடன் இணைந்து செயல்பட உள்ளது.

இந்த அணை திட்டம் குறித்து அருணாசலப் பிரதேச முதல்வர் பெமா காண்டு அதிரடி எச்சரிக்கை விடுத்துள்ளார். “சீனாவை நம்ப முடியாது. அவர்கள் என்ன செய்கிறார்கள் என்பதை யாரும் முன்கணிக்க முடியாது. அவர்கள் கட்டும் இந்த அணை, நம் பழங்குடியினரின் வாழ்வாதாரத்துக்கும், சுற்றுச்சூழலுக்கும் பேராபத்தை ஏற்படுத்தும்,” என அவர் தெரிவித்துள்ளார்.

மேலும், இந்த அணை தண்ணீர் வெடிகுண்டு போன்று செயல்படக்கூடிய அபாயத்தை கொண்டது என்றும், சீனா இதைப் பயன்படுத்தி நமது பகுதிகளை வறட்சி பாதிப்புக்கு உள்ளாக்கலாம் என்றும் குற்றஞ்சாட்டியுள்ளார்.

இந்த அணை கட்டப்பட்டுவிட்டால், இந்தியாவின் சியாங் மற்றும் பிரம்மபுத்திரா நதிகள் வறண்டு போகும் அபாயம் உள்ளது. குறிப்பாக, பிரம்மபுத்திரா நதி இந்தியா, வங்கதேசம் ஆகிய நாடுகளில் வழிந்து, வங்காள விரிகுடாவில் கலக்கும் உலகின் முக்கியமான நீர்வளங்களில் ஒன்றாகும்.

சீனா தற்போது கட்டும் திட்டங்கள், நீர்வள பாதுகாப்பு, சூழலியல் சமநிலை மற்றும் நாடுகளிடையேயான நம்பிக்கைக்கு பெரும் சவாலாக பார்க்கப்படுகின்றன. இதனால், இந்திய அரசு இந்த விவகாரத்தில் உடனடி நடவடிக்கைகளை எடுக்க வேண்டும் என வலியுறுத்தப்படுகிறது.