லண்டன்: “டிம் குக், ஜெனிஃபர் அனிஸ்டன்லாம் அதிகாலையில எந்திரிக்கிறாங்கன்னு நீங்களும் அலாரத்தை வச்சு உடம்பைக் கெடுத்துக்காதீங்க , அறிவியல் சொல்ற ரகசியமே வேற !” என்று லண்டனைச் சேர்ந்த ‘தி கான்வர்சேஷன்’ அறிவியல் இதழ் வெளியிட்டுள்ள புதிய ஆராய்ச்சி அறிக்கை, “அதிகாலை 5 மணிக்கு எழுந்தால் மட்டுமே வெற்றி பெற முடியும்” என்ற உலகளாவிய பொது நம்பிக்கையை அடியோடு தகர்த்து இணையவாசிகளிடையே பெரும் விவாதத்தைக் கிளப்பியுள்ளது.

ஆப்பிள் நிறுவனத்தின் டிம் குக் மற்றும் தொழிலதிபர் ரிச்சர்ட் பிரான்சன் போன்ற உலகப் புகழ்பெற்ற பிரபலங்கள் தங்களின் நாளை விடியற்காலையிலேயே தொடங்கினாலும், அவ்வாறு அதிகாலையில் எழுவது மட்டுமே ஒருவரின் வெற்றிக்கு எந்தவித உத்தரவாதத்தையும் அளிக்காது என்றும், ஒவ்வொரு மனிதரின் உடலமைப்பும் முற்றிலும் வெவ்வேறானது என்றும் அந்த ஆய்வு எச்சரிக்கிறது.

ஒரு நபர் அதிகாலையில் சுறுசுறுப்பாக இயங்குவதா அல்லது இரவில் சிறப்பாகச் செயல்படுவதா என்பதை அவர்களின் சர்க்காடியன் தாளம் எனப்படும் ‘உயிரியல் கடிகாரம்’ மற்றும் காலவகை (Chronotype) சார்ந்த மரபணுக்களே முழுமையாகத் தீர்மானிக்கின்றன.

இதில் விடியற்காலையிலேயே அலாரம் இல்லாமல் இயல்பாக விழித்துக் கொள்ளும் காலை வகையினர் (Morning Owls) ஒருபுறமிருக்க, மதிய வேளையிலும் இரவிலும் அசுர ஆற்றலுடன் செயல்படும் மாலை நேர வகையினரும் (Night Owls) நம்மிடையே கணிசமாக வாழ்கின்றனர்.

தங்களின் இயற்கையான உடல் தாளத்திற்கு மாறாக, இந்த மாலை நேர ஆளுமை கொண்டவர்கள் உலகப் பிரபலங்களைப் பார்த்துப் போலிப் பெருமைக்காகக் கட்டாயப்படுத்தி அதிகாலையில் எழுந்தால், அது அவர்களுக்குப் பெரும் நன்மைகளைத் தருவதற்குப் பதிலாக, காலப்போக்கில் கடுமையான தூக்கமின்மை, கவனம் சிதறல், சோர்வு மற்றும் மனச்சோர்வு போன்ற பேராபத்துகளையே உருவாக்கும் என்று ஆராய்ச்சியாளர்கள் அடுக்கடுக்கான ஆதாரங்களுடன் சுட்டிக்காட்டியுள்ளனர்.

எனவே, பிறர் சொல்வதைக் கேட்டு உங்களின் உயிரியல் கடிகாரத்திற்கு எதிராகப் போரிடுவதை நிறுத்திவிட்டு, உங்கள் உடலின் இயற்கையான தாளத்திற்குப் பொருந்தக்கூடிய ஒரு வழக்கத்தை உருவாக்குவதே உங்களின் உற்பத்தித்திறனையும் ஆரோக்கியத்தையும் உச்சத்திற்குக் கொண்டு செல்லும் சிறந்த வழியாகும்.