மத்திய கிழக்கு பிராந்தியத்தில் நிலவும் பதற்றமான சூழலில், ஹார்முஸ் ஜலசந்திக்கு அடுத்தபடியாக உலக நாடுகளை அச்சுறுத்தும் ஒரு முக்கிய போக்குவரத்து முனையமாக உருவெடுத்துள்ளது. அரபு மொழியில் ‘கண்ணீரின் வாசல்’ என்று பொருள்படும் இந்த ஜலசந்தி, செங்கடலையும் ஏடன் வளைகுடாவையும் இணைக்கும் ஒரு குறுகிய பாதையாகும்.
மேலும் ஆசியாவிற்கும் ஐரோப்பாவிற்கும் இடையே நடைபெறும் கடல்வழி வர்த்தகத்தில் இது மிக முக்கியமான பங்கினை வகிக்கிறது. குறிப்பாக, சூயஸ் கால்வாய் வழியாகச் செல்லும் ஆயிரக்கணக்கான சரக்குக் கப்பல்கள் மற்றும் எரிபொருள் ஏந்திய டேங்கர்கள் இந்தப் பாதையைத்தான் நம்பியுள்ளன. தற்போது ஏமனில் உள்ள ஹூதி கிளர்ச்சியாளர்களின் தாக்குதல்கள் இந்தப் பகுதியில் அதிகரித்துள்ளதால், கப்பல் போக்குவரத்து நிறுவனங்கள் பெரும் அச்சத்தில் உள்ளன.
இந்த முக்கியமான கடல்வழிப் பாதையில் ஏற்படும் இடையூறுகள் உலகப் பொருளாதாரத்தில் பெரும் பாதிப்பை ஏற்படுத்தும் என்று நிபுணர்கள் எச்சரிக்கின்றனர். இங்கிருந்து கப்பல்கள் திசைதிருப்பப்பட்டால், அவை ஆப்பிரிக்காவின் நன்னம்பிக்கை முனையைச் சுற்றி நீண்ட தூரம் பயணிக்க வேண்டியிருக்கும்.
இது பயண நேரத்தை அதிகரிப்பதோடு மட்டுமல்லாமல், எரிபொருள் செலவு மற்றும் காப்பீட்டுத் தொகையையும் பலமடங்கு உயர்த்தும். இதன் விளைவாக உலக சந்தையில் அத்தியாவசியப் பொருட்களின் விலை உயர்ந்து, நுகர்வோருக்கு பெரும் சுமையை ஏற்படுத்தும். ஹார்முஸ் ஜலசந்தியைப் போலவே, இந்தப் பகுதியும் தற்போது சர்வதேச கப்பல் போக்குவரத்துத் துறையை ‘கண்ணீர்’ விட வைக்கும் ஒரு பெரும் நெருக்கடிப் புள்ளியாக மாறியுள்ளது.
