செயற்கை நுண்ணறிவுத் தொழில்நுட்பமான சாட்ஜிபிடியை இன்றைக்கு உலகளவில் கோடிக்கணக்கான மக்கள் தங்களின் அன்றாட தேவைகளுக்கும் சந்தேகங்களைத் தீர்த்துக்கொள்வதற்கும் பயன்படுத்தி வருகின்றனர். ஆனால், இதில் கேட்கப்படும் சில ஆபத்தான மற்றும் சட்டவிரோதமான கேள்விகளால் நேரடியாகவே காவல்துறையின் நடவடிக்கைக்கு ஆளாக நேரிடும் என்ற அதிர்ச்சி தகவல் வெளியாகியுள்ளது.

ஏதோ ஒரு ஆர்வத்திலோ அல்லது தெரியாமலோ சாட்ஜிபிடியில் நாம் தேடும் சில குறிப்பிட்ட விஷயங்கள், நம்மை நேரடியாகச் சிறைக் கம்பிகளுக்குப் பின்னால் தள்ளிவிடும் அபாயம் கொண்டவை என்பதைப் பயனர்கள் அனைவரும் உடனடியாகப் புரிந்துகொள்ள வேண்டியது மிகவும் அவசியமாகும்.

குறிப்பாகத் துப்பாக்கி போன்ற ஆயுதங்களைத் தயாரிப்பது எப்படி, வெடிபொருட்களைச் செய்வது எப்படி, சட்டவிரோத போதைப்பொருட்களை உற்பத்தி செய்வது அல்லது வாங்குவது எப்படி என்பது போன்ற கேள்விகளைச் சாட்ஜிபிடியில் தேடுவது மிகக் கடுமையான குற்றமாகும்.

அதேபோல, சைபர் குற்றங்கள், ஹேக்கிங் முறைகள், குழந்தை ஆபாச உள்ளடக்கங்கள் அல்லது நாட்டின் பாதுகாப்புக்கு அச்சுறுத்தல் விளைவிக்கும் எந்தவொரு பயங்கரவாத நடவடிக்கைகளுக்கான வழிகாட்டல்களையும் தேடுவது உடனடியாகக் கண்காணிப்பு வளையத்திற்குள் கொண்டுவரப்படும்.

இந்தத் தொழில்நுட்ப நிறுவனங்கள் தங்களது சர்வர்களில் பதிவாகும் இதுபோன்ற தேடல்களைக் தீவிரமாகக் கண்காணித்து, சட்டவிரோத நடவடிக்கைகளை உடனுக்குடன் அரசு மற்றும் காவல் துறை அமைப்புகளுக்கு எச்சரிக்கையாக அனுப்பி வைக்கின்றன.

தொழில்நுட்பம் நமக்கு உதவ வந்த ஒரு கருவியே தவிர, சட்டத்தின் பிடியில் இருந்து தப்பிப்பதற்கான மறைவிடமல்ல என்பதை உணர்ந்து செயல்பட வேண்டும். “எனக்குத் தெரியாமல் தேடிவிட்டேன்” என்ற அறியாமை சாக்குப்போக்குகள் சட்டத்தின் முன் செல்லுபடியாகாது என்பதால், சாட்ஜிபிடியைப் பயன்படுத்தும் போது மிகுந்த கவனத்துடன் இருக்க வேண்டும்.

மேலும் தேவையற்ற மற்றும் ஆபத்தான விஷயங்களை இணையத்திலும் AI செயலிகளிலும் தேடுவதைத் தவிர்த்து, பயனுள்ள கல்வி மற்றும் பணி சார்ந்த தேவைகளுக்கு மட்டும் தொழில்நுட்பத்தைப் பயன்படுத்துவதே பாதுகாப்பானது என்பதை இத்தகைய எச்சரிக்கைகள் நமக்குத் தெளிவுபடுத்துகின்றன.