நேபாள நாட்டில் அண்மையில் ஏற்பட்ட கோரமான பனிப்பாறைச் சரிவு மற்றும் திடீர் வெள்ளப்பெருக்கு போன்ற சம்பவங்கள் உலக நாடுகளின் கவனத்தை ஈர்த்துள்ள நிலையில், இது வெறும் ஆரம்பம் மட்டுமே என்று புவியியல் மற்றும் மூலோபாய நிபுணர்கள் கடும் எச்சரிக்கை விடுத்துள்ளனர். இமயமலைப் பகுதியில் சீனா மேற்கொண்டு வரும் அதீத கட்டுமானப் பணிகள் மற்றும் அணை கட்டும் திட்டங்கள் எதிர்காலத்தில் இந்தியாவிற்கு மிகப் பெரிய பேரழிவை ஏற்படுத்தக்கூடும் என்ற அச்சம் தற்போது எழுந்துள்ளது.

சீனா தனது ஆதிக்கத்தின் கீழ் உள்ள திபெத் தன்னாட்சிப் பகுதியில், யார்லுங் சாங்போ (இந்தியாவில் பிரம்மபுத்திரா என அழைக்கப்படும்) நதியின் குறுக்கே ‘மெடோக்’ என்ற பிரம்மாண்டமான நீர்மின் அணையை மிகத் தீவிரமாக நிர்மாணித்து வருகிறது. உலகிலேயே நிலநடுக்க அபாயம் அதிகம் உள்ள அதிபாயகரமான மண்டலத்தில் சுமார் 60,000 மெகாவாட் மின் உற்பத்தித் திறன் கொண்ட இந்த அணை அமைக்கப்பட்டு வருவதுடன், இது ஒரு “நீர் வெடிகுண்டு” போன்று செயல்படும் என சர்வதேச நிபுணர்கள் பகிரங்கமாக எச்சரித்துள்ளனர்.

இந்த அணை திட்டமிடப்பட்டுள்ள தளத்திற்கு மிக அருகில் செயலில் உள்ள நிலநடுக்க அபாயக் கோடு இருப்பது ஆய்வுகளில் கண்டறியப்பட்டுள்ளது. சீனா இந்த மெடோக் அணை கட்டுமானப் பணிகளை முழுமையாக நிறைவு செய்தால், எதிர்காலத்தில் அணை உடையும் பட்சத்திலோ அல்லது பருவமழை காலங்களில் ஒரே நேரத்தில் அதிகப்படியான நீர் திறந்துவிடப்படும் போதோ அருணாச்சலப் பிரதேசம் மற்றும் அசாம் உள்ளிட்ட இந்தியாவின் வடகிழக்கு மாநிலங்கள் முற்றிலும் அழியும் அபாயம் உள்ளதாகத் தகவல்கள் வெளியாகியுள்ளன.