புதுக்கோட்டை நகரின் மையப் பகுதியில் இருந்து சுமார் ஒன்றரை கிலோமீட்டர் தொலைவில் உள்ள திருகோகர்ணத்தில் சக்தி வாய்ந்த ‘அரைக்காசு அம்மன்’ திருக்கோவில் அமைந்துள்ளது. புதுக்கோட்டை சமஸ்தான அரச குடும்பத்தினரின் குலதெய்வமாக விளங்கும் அன்னை பிரகதாம்பாளின் குடைவரை கோயில், கி.பி. 7 ஆம் நூற்றாண்டிற்கும் முற்பட்டது என்ற வரலாற்றுச் சிறப்புமிக்கது.

இத்தலத்தில் அருள் பாலிக்கும் அன்னை பிரகதாம்பாளையே மக்கள் அன்போடு ‘அரைக்காசு அம்மன்’ என்று அழைக்கிறார்கள். ஒருமுறை புதுக்கோட்டையை ஆண்ட மன்னர் ஒருவர் நாட்டின் மிக முக்கியமான ஆவணத்தைத் தவறவிட்டுத் தவித்தபோது, அன்னையிடம் முறையிட்டு வேண்டினார். அம்மனின் அருளால் அந்த ஆவணம் திரும்பக் கிடைத்ததால், மன்னர் நன்றிக்கடனாகத் தான் வெளியிட்ட ‘அரைக்காசு’ நாணயத்தில் அம்மனின் உருவத்தைப் பதித்து மக்களுக்கு விநியோகித்தார். அதுமுதல் அன்னைக்கு அரைக்காசு அம்மன் என்ற பெயர் நிலைத்துவிட்டது.

மனித வாழ்வில் தொலைந்துபோன பொருட்கள், கைநழுவிப் போன சொத்துக்கள், பிரிந்து சென்ற உறவுகள் மற்றும் காணாமல் போன மனிதர்கள் மீண்டும் கிடைக்கச் செய்யும் அற்புத சக்தியுடையவராக இந்த அம்மன் போற்றப்படுகிறார். “சாத்தியமே இல்லை” என்று நினைக்கக்கூடிய காரியங்களைக் கூட, உண்மையான பக்தியோடு வந்து வேண்டினால் அன்னை நிறைவேற்றித் தருவாள் என்பது பக்தர்களின் அசைக்க முடியாத நம்பிக்கையாகும்.

இக்கோவிலில் பிரதான தெய்வங்களாகச் சிவபெருமானும், மகா மங்களநாயகியான பிரகதாம்பாள் அம்மனும் வீற்றிருக்கின்றனர். வேறு எந்த ஆலயத்திலும் இல்லாத சிறப்பம்சமாக, மேல் தளத்தில் முருகப்பெருமான் வள்ளி தெய்வானையுடன் காட்சி தருகிறார். மேலும், காமதேனு பசு பூலோகத்திற்கு வந்து சிவபெருமானை வழிபட்டு சாபவிமோச்சனம் பெற்ற தலமாகவும் இது புராணங்களில் குறிப்பிடப்படுகிறது.

தவறவிட்ட பொருள் அல்லது உறவுகள் திரும்பக் கிடைத்தவுடன், பக்தர்கள் நேர்த்திக்கடனாக வெல்லத்தால் பிள்ளையார் செய்து, சுக்கு மற்றும் வெல்லம் கலந்த பானகம் தயாரித்து அம்மனுக்கு நிவேதனம் செய்கிறார்கள். எலுமிச்சை மாலை அணிவித்தும், அஷ்டோத்திரம் கூறியும் வழிபடுகிறார்கள். திருமணத்தடை நீங்கவும், குடும்ப ஒற்றுமை பெருகவும் இக்கோவிலுக்கு வந்து வழிபடலாம்.