மனிதர்களின் வாழ்க்கையில் ஏற்படும் பல்வேறு துன்பங்களுக்கும், தடைகளுக்கும் அவர்கள் ஜாதகத்தில் இருக்கும் தோஷங்களும், செய்த கர்ம வினைகளுமே முக்கியக் காரணமாக அமைகின்றன. நவகிரகங்களையும் தன் கட்டுப்பாட்டுக்குள் வைத்திருக்கும் முழுமுதற் கடவுளான விநாயகப் பெருமானை மனமுருகி வழிபடுவதன் மூலம், எப்பேர்ப்பட்ட கிரக தோஷங்கள் மற்றும் தீவினைகளில் இருந்தும் மிக எளிதாக நிவர்த்தி பெற முடியும் என்று ஆன்மீகச் சான்றோர்கள் வழிகாட்டுகின்றனர்.

இந்தத் தோஷ நிவர்த்தி வழிபாட்டை ஒவ்வொரு தமிழ் அல்லது ஆங்கில மாதத்தின் முதல் ஞாயிற்றுக்கிழமை அன்று செய்வது மிகவும் விசேஷமானது. அன்றைய தினம் அதிகாலை பிரம்ம முகூர்த்த நேரத்திலோ அல்லது காலை 7:45 மணி முதல் 8:45 மணி வரையிலான நேரத்திலோ, அல்லது மாலை 6:30 மணி முதல் 7:30 மணி வரையிலான சுப நேரத்திலோ பூஜையைத் தொடங்கலாம். பூஜை அறையில் உள்ள விநாயகர் படம் அல்லது விக்ரகத்திற்குச் சந்தனம், குங்குமமிட்டு மலர்களால் அலங்கரித்துக் கொள்ள வேண்டும்.

வழிபாட்டின் போது விநாயகர் முன்பாக ஒரு தட்டை வைத்து, அதில் பச்சையான அருகம்புல்லைப் பரப்ப வேண்டும். அந்த அருகம்புல்லின் மீது ஒரு அகல் விளக்கை வைத்து, தேங்காய் எண்ணெய் ஊற்றி பஞ்சுத்திரியிட்டு கிழக்கு திசை நோக்கித் தீபம் ஏற்ற வேண்டும். பின்னர் ஏதேனும் ஒரு எளிய நெய்வேத்தியத்தைப் படைத்து, தீபச் சுடரைப் பார்த்தவாறே “ஓம் கணேசாய நமஹ” என்ற சக்திவாய்ந்த மந்திரத்தை 54 முறை பக்தியுடன் ஜபிக்க வேண்டும்.

இந்த தீபமானது குறைந்தபட்சம் அரை மணி நேரமாவது தொடர்ந்து எரிய வேண்டும் என்பதும், பின்னர் தீபத்தைக் குளிரவைத்துவிட்டு அந்த அருகம்புல்லை விநாயகரின் திருவுருவப் படத்திற்கு முன்பாக வைக்க வேண்டும் என்பதும் முக்கிய அம்சமாகும்.

மாதத்தின் முதல் ஞாயிறன்று இந்த எளிய அருகம்புல் தீப வழிபாட்டைத் தொடர்ந்து செய்து வருவதன் மூலம், குடும்பத்தில் உள்ள அனைத்துத் தோஷங்களும் நீங்கி, சகல ஐஸ்வர்யங்களும் நிறைந்த நிம்மதியான வாழ்க்கை அமையும்.