முன்னாள் அமைச்சர் செந்தில் பாலாஜி தொடர்புடைய இடங்களில் லஞ்ச ஒழிப்புத்துறையினர் நடத்தி வரும் சோதனைகள் மற்றும் அதையொட்டி அறப்போர் இயக்கம் வெளியிட்டுள்ள புதிய ஆதாரங்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. மின்வாரிய டெண்டர் முறைகேடுகளில் முக்கிய நபராகக் கூறப்படும் காசி என்பவர் குறித்த திடுக்கிடும் தகவல்கள் தற்போது வெளியாகியுள்ளன.

மின்வாரியத்தில் டிரான்ஸ்பார்மர் மற்றும் கண்டக்டர் கொள்முதல் தொடர்பான டெண்டர் குழுவில் நிதி கட்டுப்பாட்டாளராகப் பணியாற்றிய காசி, தனது அலுவலகமான TNEB தலைமைச் செயலகத்திற்குச் சென்று பணியாற்றாமல், தேனாம்பேட்டையில் உள்ள தனது வீட்டில் இருந்து தினமும் காலை கிளம்பிச் சென்றுள்ளார். தேனாம்பேட்டையில் உள்ள வீட்டில் இருந்து காலை நேரத்தில் புறப்படும் காசி, நேராக அப்போதைய மின்சாரத்துறை அமைச்சர் செந்தில் பாலாஜி வசிக்கும் கிரீன்வேய்ஸ் சாலை இல்லத்திற்குச் சென்று, அங்கே தன் முழு நாளையும் செலவிட்டுள்ளார் என்று சுட்டிக்காட்டப்பட்டுள்ளது.

அமைச்சரின் இல்லத்தில் இருந்தபடியே பல முக்கிய டெண்டர் முடிவுகளைக் கையாண்டு வந்ததாகக் கூறப்படும் இந்த விவகாரம் குறித்து, முறையான ஆதாரங்களை அறப்போர் இயக்கம் சம்பந்தப்பட்ட விசாரணை அமைப்புகளிடம் வழங்கியுள்ளது. அலுவலக விதிகளுக்குப் புறம்பாக அமைச்சரின் இல்லத்தில் இருந்து அலுவலகப் பணிகளைக் கையாண்டதுடன், முறைகேடுகளுக்கு உடந்தையாக இருந்ததாகக் கூறப்படும் இந்த விவகாரத்தில் அப்போதைய அமைச்சரும் விசாரிக்கப்பட வேண்டும் என்ற கோரிக்கைகள் வலுத்து வருகின்றன.

“>

 

அரசு அலுவலகப் பணியை அமைச்சரின் இல்லத்திலிருந்து கையாண்டது தொடர்பான இந்த அதிரடித் தகவல்கள் தற்போது தமிழக அரசியலில் தீவிர விவாதத்தை ஏற்படுத்தியுள்ளன.