அமெரிக்க ஜனாதிபதி டொனால்ட் டிரம்ப் ஜனவரி 20ஆம் தேதி அனைத்து அரசு ஊழியர்களும் முழு நேர அலுவலக பணிக்கு திரும்ப வேண்டும் என்ற உத்தரவை பிறப்பித்தார். இந்த முடிவு, அரசு வேலை திறனை மேம்படுத்துவதற்கும், செலவினங்களை கட்டுப்படுத்துவதற்கும் எலான் மஸ்க் தலைமையிலான “Department of Government Efficiency” (DOGE) ஒத்துழைப்புடன் மேற்கொள்ளப்பட்டதாக தெரிவிக்கப்பட்டுள்ளது. இதன் விளைவாக, பல அரசு ஊழியர்கள் தங்கள் பணிகளை விட்டு வெளியேறியுள்ளனர். ரொய்ட்டர்ஸ் செய்தி நிறுவனத்தின் தகவலின்படி, இதுவரை 1 லட்சத்திற்கும் அதிகமான அரசு ஊழியர்கள் தங்கள் பதவிகளை ராஜினாமா செய்துள்ளதோடு, மேலும் பல பேருக்கு  நிவாரண தொகுப்பு வழங்கப்பட்டுள்ளது.

விண்வெளி ஆராய்ச்சி நிறுவனமான NASA தலைமையகத்திலும், மற்ற முக்கியமான அரசுத் துறைகளிலும் அலுவலக சூழல் மோசமாக இருப்பதாக ஊழியர்கள் புகார் தெரிவிக்கின்றனர். அலுவலக கட்டிடங்களில் கரப்பான் பூச்சிகள், தொல்லை தரும் புழுக்கள் இருந்ததோடு, சிலர் மேசை இல்லாமல் வேலை செய்ய வேண்டிய நிலை ஏற்பட்டுள்ளது. வேலைகள் மிகவும் அசாதாரணமான சூழலில் நடைபெற்று வருவதாகவும், ஊழியர்கள் தங்கள் சொந்த கார்களிலிருந்தே இணைய வாயிலாக கூட்டங்களில் கலந்து கொள்வதாகவும் கூறப்படுகிறது. சில அலுவலகங்களில், கூட்டுறவு வசதிகள் போதியதாக இல்லாததால், ஊழியர்கள் தங்களுக்கே உரிய இருக்கைகள் மற்றும் மேசைகளை தேடி போராடும் நிலை ஏற்பட்டுள்ளது.

அரசு  ஊழியர்களை முழு நேர அலுவலக பணிக்கு திரும்ப வைப்பதன் நோக்கம், அவர்களை வேலையை விட்டு வெளியேற கட்டாயப்படுத்தும் ஒரு திட்டம் என்ற குற்றச்சாட்டை தொழிலாளர் சங்கங்கள் முன்வைத்துள்ளன. “National Federation of Federal Employees” இயக்குநர் ஸ்டீவ் லென்கார்ட், “இந்த முடிவு வேலை செய்யும் சூழலை இன்னும் மோசமாக்கும், மேலும் அரசு ஊழியர்கள் தங்களை வெளிப்படுத்த முடியாத சூழல் உருவாகும்” என்று விமர்சித்துள்ளார். இருப்பினும், வெள்ளை மாளிகை அதிகாரிகள், இந்த மாற்றம் அரசு பணியாளர்களின் செயல்திறனை மேம்படுத்துவதற்காக மேற்கொள்ளப்பட்டதாகவும், தற்போதுள்ள அலுவலக பிரச்சனைகளை விரைவாகத் தீர்ப்பதற்காக நடவடிக்கைகள் எடுக்கப்பட்டு வருவதாகவும் கூறியுள்ளனர்.