துருக்கியுடனான பதற்றம் தொடர்ந்து அதிகரித்து வரும் நிலையில், டாடா குழுமத்தின் கீழ் இயங்கும் ஏர் இந்தியா நிறுவனம் ஒரு முக்கிய முடிவை எடுத்துள்ளது. இனி தங்கள் விமானங்களை பழுதுபார்ப்பதற்காக துருக்கிய நிறுவனங்களின் நுட்பங்களை அதிகமாக சார்ந்திருக்க மாட்டோம் என நிறுவனம் தெரிவித்துள்ளது.

ஏர் இந்தியா தனது போயிங் 777 மற்றும் 787 வகை அகலமான உடல் கொண்ட விமானங்களை பழுதுபார்க்கும் பணிக்காக மற்ற நாடுகளுக்கு அனுப்ப திட்டமிட்டுள்ளது. இந்த முடிவை இந்திய அரசாங்கத்தின் தேசிய பாதுகாப்பு நோக்கங்களை கருத்தில் கொண்டு எடுத்துள்ளதாக நிறுவனம் தெரிவித்துள்ளது.

இதுகுறித்து ஏர் இந்தியா தலைமை நிர்வாக அதிகாரி கேம்பல் வில்சன் கூறியதாவது: “விமான பழுதுபார்ப்பு என்பது ஒரு உலகளாவிய வணிகம். சூழ்நிலை மாறும்போது நாம் திட்டங்களை மாற்றிக் கொள்ள வேண்டும். நாங்கள் இந்தியா மக்களின் உணர்வுகளை கவனித்து செயல்படுகிறோம்.”

தற்போது, துருக்கிய டெக்னிக் நிறுவனம் ஏர் இந்தியாவின் சில விமானங்களை பழுதுபார்க்கும் பணியில் ஈடுபட்டு வருகிறது. ஆனால் இனி, மிகவும் குறைந்த எண்ணிக்கையிலான விமானங்களே துருக்கிக்கு அனுப்பப்படும் என்றும், மத்திய கிழக்கு, தென்கிழக்கு ஆசியா, அமெரிக்கா ஆகிய நாடுகளில் உள்ள வசதிகளைப் பயன்படுத்தப்போகிறோம் என்றும் வில்சன் கூறினார்.

இந்த முடிவின் பின்னணியாக கூறப்படுவது,  மே மாதத்தில் இருந்து துருக்கிக்கும்,  இந்தியாவுக்கும்  இடையே பதற்றம் ஏற்பட்டுள்ளது. மேலும் இந்தியாவின் “ஆபரேஷன் சிந்தூர்” நடவடிக்கையை துருக்கி கண்டித்தது. அதனையடுத்து பாகிஸ்தானுக்கு துருக்கி வெளிப்படையான ஆதரவு அளித்தது. இவற்றை தொடர்ந்து, துருக்கிய நிறுவனங்களின் இந்தியாவிலுள்ள பாதுகாப்பு அனுமதிகளை ரத்து செய்தது இந்திய அரசு.

மேலும், ஏர் இந்தியா மொத்தம் 191 விமானங்களை கொண்டுள்ளது. இதில் 64 அகலமான உடலுடன் கூடிய ஜெட் விமானங்கள் அடங்கும். துருக்கியின் சேவைகளை தவிர்க்கும் இந்த நடவடிக்கையால், இந்திய விமான பழுதுபார்ப்பு துறைக்கு ஊக்கம் கிடைக்கும் என நிபுணர்கள் மதிப்பீடு செய்கிறார்கள்.

இந்த முடிவுகள் இந்தியாவின் “தன்னிறைவு இந்தியா” நோக்கத்தையும் வலியுறுத்துவதாகும். எதிர்காலத்தில் இந்தியா தனது விமான பழுதுபார்ப்பு தொழில்நுட்பத்தைக் கூடிய விரைவில் மேம்படுத்தும் வாய்ப்பு அதிகம் உள்ளது.