ஒடிசா மாநிலத்தின் மூத்த ஐஏஎஸ் அதிகாரியும், வி.கே. பாண்டியனின் மனைவியுமான சுஜாதா, விருப்ப ஓய்வு பெற விண்ணப்பித்துள்ளார் என்ற தகவல் அதிகாரப்பூர்வ வட்டாரங்களில் இருந்து வெளியாகியுள்ளது. 2000-ஆம் ஆண்டு ஒடிசா காடர் ஐஏஎஸ் அதிகாரியாக தேர்வு செய்யப்பட்ட சுஜாதா, தற்போது நிதித்துறையில் சிறப்புச் செயலாளராக பணியாற்றி வருகிறார். தனிப்பட்ட காரணங்களை மேற்கோளாகக் கொண்டு, அவர் விருப்ப ஓய்வு கோரியதாக சனிக்கிழமையன்று உறுதி செய்யப்பட்டுள்ளது.

சுஜாதாவின் கணவரும், தமிழ்நாட்டைச் சேர்ந்த முன்னாள் ஐஏஎஸ் அதிகாரியுமான வி.கே. பாண்டியன், கடந்த ஆண்டு அக்டோபரில் அரசுப் பணியை விலகி, பிஜு ஜனதா தளத்தில் இணைந்திருந்தார். ஆனால், 2024 மாநிலத் தேர்தலில் கட்சி எதிர்பாராத தோல்வியை சந்தித்தது. இதற்குப் பாண்டியன் தான் காரணம் எனக் கூறி கடுமையாக விமர்சிக்கப்பட்டார். இதையடுத்து, அவர் தீவிர அரசியலில் இருந்து விலகுவதாக அறிவித்தார். தற்போது அவரது மனைவியும் பணியிலிருந்து ஓய்வு பெறத் திட்டமிட்டிருப்பது, அரசியல் கோணத்தில் புதிய கணிப்புகளை உருவாக்கியுள்ளது.