இந்த வழக்கில் முக்கிய குற்றவாளியாக லாலி குமார் என்பவரை போலீஸார் கைது செய்துள்ளனர். போலீஸ் விசாரணையின்படி, லாலி குமாரின் சகோதரிக்கும் உயிரிழந்தவர்களில் ஒருவரான நீஷு குமாருக்கும் நீண்டகாலமாக காதல் தொடர்பு இருந்ததாகக் கூறப்படுகிறது. இதனால் ஆத்திரமடைந்த லாலி, தனது சகோதரியின் காதல் விவகாரத்தால் ஏற்பட்ட அவமானம் மற்றும் கோபத்தின் காரணமாக பழிவாங்கத் திட்டமிட்டதாக போலீஸார் தெரிவித்துள்ளனர். இதையடுத்து தனது நண்பர்களின் உதவியுடன் சம்பவத்துக்கான திட்டம் தீட்டப்பட்டதாகவும் கூறப்படுகிறது.
போலீஸாரின் கூற்றுப்படி, சந்தேகநபர் சந்தையில் இருந்து விஷப் பொருளை வாங்கி, அதை மதுவில் கலந்ததாக விசாரணையில் தெரியவந்துள்ளது. பின்னர் நீஷு மற்றும் அவரது நண்பர்களை மது விருந்துக்கு அழைத்து, அந்த விஷம் கலந்த மதுவை அவர்களுக்கு கொடுத்ததாக போலீஸார் கூறுகின்றனர். அதை அருந்திய பின்னர் நான்கு பேரின் உடல்நிலை மோசமடைந்து, இறுதியில் அவர்கள் உயிரிழந்ததாக விசாரணையில் தெரியவந்துள்ளது. இந்த சம்பவத்தில் லாலி குமார் உள்ளிட்ட மூவர் கைது செய்யப்பட்டுள்ள நிலையில், மற்றொரு நபரைத் தேடும் பணி நடைபெற்று வருகிறது.
நான்கு இளைஞர்களின் மரணம் குறித்து விசாரணை நடத்த சிறப்பு புலனாய்வுக் குழுவும் அமைக்கப்பட்டது. சம்பவ இடத்தில் இருந்த உணவு, தண்ணீர் மற்றும் மதுப் பாட்டில்கள் உள்ளிட்ட பொருள்கள் தடயவியல் பரிசோதனைக்காக சேகரிக்கப்பட்டுள்ளன. ஆரம்பத்தில் கள்ளச்சாராயம் காரணமாக உயிரிழப்பு ஏற்பட்டிருக்கலாம் என்ற சந்தேகம் எழுந்த நிலையில், போலீஸாரின் புதிய விசாரணை கோணம் வழக்கையே மாற்றியுள்ளது. இருப்பினும் விஷம் எங்கிருந்து வாங்கப்பட்டது, சம்பவத்தில் தொடர்புடைய அனைவரின் பங்கு என்ன என்பது குறித்து தொடர்ந்து விசாரணை நடைபெற்று வருகிறது.
