காய்ச்சல், இருமல், உடல்வலி, தலைவலி போன்ற அறிகுறிகள் இருந்தால் அது சாதாரண வைரஸ் தொற்றா அல்லது பன்றிக் காய்ச்சல் எனப்படும் எச்1என்1 தொற்றா என்ற குழப்பம் பலருக்கும் ஏற்படுகிறது. குறிப்பாக தற்போது காய்ச்சல் மற்றும் காய்ச்சல் போன்ற அறிகுறிகள் அதிகமாகக் காணப்படும் நிலையில், இரண்டுக்கும் இடையிலான வித்தியாசத்தை தெரிந்துகொள்வது அவசியம். ஆரம்ப அறிகுறிகள் பல நேரங்களில் ஒரே மாதிரியாக இருப்பதால், அறிகுறிகளை மட்டும் வைத்து உறுதியாக முடிவு செய்ய முடியாது.

மருத்துவ நிபுணர்களின் கூற்றுப்படி, எச்1என்1 உள்ளிட்ட காய்ச்சல் தொற்றுகளில் அறிகுறிகள் திடீரெனத் தொடங்குவது வழக்கமாக இருக்கலாம். அதிக காய்ச்சல், உடல் மற்றும் தசைகளில் வலி, தலைவலி, அதிக சோர்வு, வறட்டு இருமல், தொண்டை வலி மற்றும் மூக்கு ஒழுகுதல் போன்றவை ஏற்படலாம். சாதாரண சளி அல்லது லேசான வைரஸ் தொற்றில், தும்மல், மூக்கு ஒழுகுதல், தொண்டை கரகரப்பு போன்றவை முக்கிய அறிகுறிகளாக இருக்கலாம்; காய்ச்சல் குறைவாக இருக்கலாம்.

ஆனால் அதிக காய்ச்சல் இருப்பது மட்டுமே பன்றிக் காய்ச்சலுக்கான உறுதியான அறிகுறி கிடையாது. அதேபோல் இருமல் அல்லது உடல்வலி இருந்தாலே எச்1என்1 என்று முடிவு செய்யவும் முடியாது. தேவையான சூழலில் மருத்துவர் பரிசோதனைகளை பரிந்துரைக்கலாம்; மூக்கின் பின்பகுதியில் இருந்து எடுக்கப்படும் மாதிரி பரிசோதனை மூலம் காய்ச்சலுக்கான வைரஸ் தொற்றை உறுதிப்படுத்த முடியும்.

சுவாசிப்பதில் சிரமம், நெஞ்சுவலி, கட்டுப்படுத்த முடியாத அதிக காய்ச்சல், அதிகப்படியான பலவீனம் அல்லது உடல்நிலை தொடர்ந்து மோசமடைதல் போன்றவை இருந்தால் உடனடியாக மருத்துவரை அணுக வேண்டும். குறிப்பாக நீரிழிவு, இதய நோய் உள்ளிட்ட ஏற்கெனவே உடல்நலப் பிரச்னைகள் உள்ளவர்கள் மற்றும் கர்ப்பிணிகள் காய்ச்சல் அறிகுறிகளை அலட்சியம் செய்யாமல் மருத்துவ ஆலோசனை பெறுவது முக்கியம்.